Në sekretariatin e Gjykatës së Posaçme për Korrupsionin dhe Krimin e Organizuar nuk është paraqitur ditën e sotme asnjë kërkesë me shkrim nga mbrojtja e Sali Berishës për përjashtimin e gjyqtares Irena Gjoka. Lajmin e ka konfirmuar GJKKO për mediat.
Një ditë më parë, Gjykata shtyu seancën gjatë së cilës do të caktohej masa e sigurisë për ish-kryeministrin Sali Berisha, për t’u dhënë kohë avokatëve të tij që të dorëzojnë kërkesën për përjashtimin e gjyqtares Irena Gjoka.
Pas njoftimit nga GJKKO kanë reaguar avokatët e Berishës të cilët janë shprehur se GJKKO nuk vuri në dispozicion vendimin e papranueshmërisë së kërkesës për përjashtimin e gjyqtares Irena Gjoka, marrë më herët nga gjykata.
“GJKKO të informojë, se cila është arsyeja qe deri ne orarin zyrtar nuk vuri ne dispozicion vendimin e papranueshmërisë se kërkesës për përjashtimin e gjyqtares Irena Gjoka sikurse i’u premtua avokateve zyrtarisht dhe verbalisht”, u shprehën ata në reagimin e tyre.
