Ish-deputeti dhe anëtari i Kryesisë së PD-së, Belind Këlliçi ka publikuar me video tre qëndrime të ndryshme të kryebashkiakut Erion Veliaj për inceneratorin e Tiranës, e cila rezultoi një aferë gjigande korruptive.
Video përmban fjalët e Veliajt në Këshillin Bashkiak në vitin 2017, në Komisionin Hetimor në vitin 2022 dhe në një intervistë televizive të pak ditëve më parë, pas arrestimeve nga SPAK për aferë. Sipas Këlliçit, Veliaj thotë se herën e parë e bëra ai, herën e dytë se e bëri paraardhësi dhe eerën e tretë se e bëri qeveria.
Më tej Këlliçi shkruan se gjatë fushatës ka dëgjuar njerëz që bindnin të tjerët se “lali” është i fortë dhe se ka shumë para dhe sipas tij, tani le të numërojnë shkurret, pemët dhe inceneratorët imagjinarë.
“Cilën nga këto fytyra keni takuar gjatë fushatës? Këtu janë 3 fytyra dhe qëndrime të ndryshme për inceneratorin e Tiranës. Secila kundërshton tjetrën. Pa pikë turpi si çdo mashtrues që të gënjen sy për sy pa iu dridhur qerpiku. Herën e parë e bëra unë thotë. Herën e dytë e bëri paraardhësi. Herën e tretë e bëri qeveria. E vërteta në fakt është një. Inicues dhe kërkues i inceneratorit të Tiranës është vetë Erion Veliaj.
Unë vetë gjatë fushatës kam dëgjuar njerëz që bindnin të tjerët se “lali” është i fortë dhe se ka shumë para. Tani le të numërojnë shkurret, pemët dhe inceneratorët imagjinarë.
Keqardhje për Tiranën dhe bashkëqytetarët e mi! Nga mashtruesi s’ka parë kush hajër.” – shkruan Këlliçi.
