Partia Socialiste ka kërkuar përjashtimin e tre deputetëve të Partisë Demokratike nga aktivitetet parlamentare, duke i konsideruar si përgjegjës për tensionet e shkaktuara në seancën e djeshme parlamentare.
Bëhet fjalë për deputetët Saimir Korrëshi, Edmond Spaho dhe Kastriot Piroli. Sipas mazhorancës këta tre ligjvënës krijuan kaos në Kuvend e ndezën tymuese, duke mos lejuar zhvillimin normal të seancës plenare një ditë më parë.
Kujtojmë se mazhoranca pas çdo seance plenare po përjashton grupe deputetësh demokrat, për tensionet e krijuara në Kuvend, të cilët kanë deklaruar se nuk do të lejojnë normalitetin deri në plotësimin e kërkesës së tyre për ngritjen e komisioneve hetimore.
Për seancën e djeshme, mazhoranca kishte përjashtuar 13 deputetë: Gazment Bardhi, Sali Berisha, Flamur Noka, Edi Paloka, Albana Vokshi, Elda Hoti, Ervin Salianji, Bledion Nallbati, Asllan Dogjani, Lefter Gështenja, Isuf Çelaj, Luan Baçi dhe Xhelal Mziu.
Në seancën e djeshme u miratua në mënyrë të njëanshme dhe pa diskutime, ndryshimi i Rregullores së Kuvendit, ku deputetët tashmë nuk do përjashtojë më me nga 10 ditë , por me 30 ose 60 ditë. Menjëherë pas përfundimit të votimit, Gazment Bardhi paralajmëroi se rregullorja e re do të çohet po në Gjykatën Kushtetuese.
