Merkatoja në dalje për ekipet shqiptare ka nisur më parë, teksa tashmë është Teuta që ka nisur me largimet e lojtarëve që nuk kanë bindur drejtuesit. Dy sulmues nuk do të jetë pjesë e durrsakëve për pjesën tjetër të sezonit, teksa mungon zyrtarizimi nga ana e klubit.
Sipas shtypit të shkruar bëhet me dije se Mario Gjata dhe Aldi Gjumsi kanë ndarë përfundimisht rrugët me “djemtë e detit” pasi nuk ishin në planet e Edi Martinit. Të dy futbollistët u afruan gjatë merkatos së verës, por në Durrës nuk ia dolën dot të gjejnë veten.
Gjata erdhi nga Apolonia, ndërsa Gjumsi nga Tirana. Tashmë të dy futbollistët do të jenë lojtarë të lirë dhe në pritje të merkatos së janarit për të gjetur një ekip të ri. Kujtojmë se ish-sulmuesi i Apolonisë u aktivizua me teutën në 13 ndeshje, duke marrë 274 minuta në këmbët e tij, ndërsa shënoi vetëm 1 gol.
Ndërkohë ish-i i Tiranës ka nisur 3 ndeshje si titullar dhe ka luajtur në total 418 minuta, por pa mundur të gjejë rrugën e rrjetës.
