Teuta preket sërish nga “sindroma” e golave të pesuara në fund. Edhe në ndeshjen e ditës së hënë ndaj Egnatias, e vlefshme për javën e 16- të, tregoi se minutat e fundit për “Djemtë e Detit” janë një “makth”.
Pavarësisht superioritetit ndaj kundërshtarit, është e pashpjegueshme se si ekipi dorëzohet në fund dhe pëson gola, duke i hequr vetes pikë të vlefshme dhe fitoret. Gjithçka nisi ndaj Laçit në Durrës, kur ndeshja ishte në favor të Teutës deri në minutën e 90-të kur barazohet gjithçka.
E njëjta situatë ndodhi edhe ndaj Partizanit një javë më parë. Ndeshja e luajtur në “Niko Dovana” ishte mbërthyer në shifrat 1-1 deri në minutën e 6-të shtesë, kur blutë arritën të shënonin me një penallti të shndërruar në gol nga Karabeci.
Në fund ndodhi ajo që bëhet çdo ditë e më tepër e pashpjegueshme. Pëson në 10 sekondat e fundit dhe merr barazimin e radhës. Ajo çka dhemb më shumë është fakti se golat e pësuar karakterizohen nga një naivitet i ekipit. Në këto tri ndeshje, kur është shfaqur “sëmundja” e vjetër, Teuta ka humbur 6 pikë, duke marrë vetëm tri të tilla.
Përveç kësaj, akoma më të dhimbshme situatën te Teuta e bën fakti se durrsakët numërojnë plot 8 ndeshje pa fituar. Aktualisht në 16 javë kampionat, Teuta, renditet në vendin e fundit me 15 pikë teksa regjistron 7 humbje, 6 barazime dhe vetëm 3 fitore ku duket sikur mekanizmat e ekipit kanë ngecur.
