Prokuroria e Posaçme ka nisur procedurat për ekstradimin e Gëzim Çelës, i njohur ndryshe si “Baroni i drogës”, drejt vendit tonë, pas arrestimit të tij ditën e premte në Kosovë.
Mësohet se SPAK, i ka deleguar dosjen e Çelës, Ministrise së Drejtesisë, me të gjitha provat e mbledhura për kete shtetas dhe akuzat që rëndojnë mbi të. Bashkelidhur me dosjen, është edhe vendimi i Gjykatës së posaçme, që ka caktuar masën e arrestit me burg ndaj Çelës, që akuzohet për trafik ndërkombëtar droge. Tashmë brënda afatit kohor, Ministria e Drejtesisë do ja përcjellë autoriteteve kosovare dosjen, për ekstradimin e tij.
Kujtojmë se ish-punonjësi i policisë i kthyer në narkotrafikant, u la dje në burg, me vendim të Gjykatës së Ferizajt.
Gjykata caktoi 40 ditë paraburgim për Çelën, që kërkohet nga autoritetet shqiptare. Kjo është procedurë e rregullt ekstradimi që ndiqet në Kosovë.
Për të, është lëshuar urdhër-arrest ndërkombëtar nga Interpoli, me kërkesë të datave 8 gusht 2014 dhe 1 mars 2022 të shtetit të Shqipërisë për shkak të veprave penale trafikimi me narkotik, prodhim dhe mbajtja pa leje e armëve luftarake dhe municionit dhe po i njëjti është dënuar me 19 vjet e 9 muaj e 29 ditë burg, argumentoi gjykata.
Emri i Gëzim Çelës është ndër të parët e përmendur si trafikant droge në Shqipëri pasi këtë aktivitet e ka nisur që në vitet 90. Dikur ish punonjës policie, ai u shndërrua në kontaktin kryesor të shpërndarjes së heroinës në vend si dhe autor i kalimit të dhjetëra kilogramëve kokainë në Kosovë.
Më herët ai ka qenë i arrestuar për “shfrytëzim prostitucioni” dhe trafik ndërkombëtar droge”.
