Autoriteti Rrugor Shqiptar (ARRSH) ka dalë me një njoftim mbi gjendjen e akseve rrugore, pasi i gjithë vendi është përfshirë nga moti i keq.
ARRSH i bën thirrje drejtuesve të mjeteve që të pajisen me goma dimërore dhe zinxhirë kur udhëtojnë për në segmentet me prezencë dëbore. Gjithashtu, kërkohet ulja e shpejtësisë, respektimi i sinjalistikës dhe udhëzimeve të Policisë Rrugore.
Kujtojmë që pasditen e sotme deri në mbrëmje ishte situatë e rënduar në Qafë Murriz ku mbi 300 persona (mes tyre gra dhe fëmije) mbetën të bllokuar prej 5 orësh për shkak të mungesës së borëpastrueses kurse autoritet lokale kanë qëndruar “duarkryq” duke mos bërë asgjë për të normalizuar situatën.
Njoftimi i ARRSH:
“Reshjet e dëborës kanë filluar në zonën juglindore dhe në akset e Dajtit ku mjetet borëbastruese janë në terren dhe qarkullimi vijon pa probleme.
Në Përrenjas-Librazhd, në Xhyrë, si pasojë e reshjeve shoqëruar me erë të fortë ka pasur rënie të një peme në trup të rrugës, e cila është hequr menjëherë.
Në Rajonin Verior kanë vijuar reshjet e dëborës me intensitet, grupet e punës janë në terren me mjete dhe punëtorë për pastrimin e rruges dhe shpërndarjen e kripës, qarkullimi vijon pa ndërprerje.
Në Bypass-in e Qafë Murrizit për shkak të reshjeve të shumta të dëborës shoqëruar me stuhi dhe përdoruesve të mjeteve që nuk janë pajisur me goma dimri apo zinxhir kanë vështirësuar qarkullimin e mjeteve, por edhe të borëpastruesve.
Po punohet për spostimin e mjeteve nga trupi i rrugës për të lejuar borëpastrueset të vijojnë me pastrimin e rrugës.
Drejtuesit e mjeteve të pajisen me goma dimërore dhe zinxhirë kur udhëtojnë për në segmentet me prezencë dëbore, të ulin shpejtësinë, të respektojnë sinjalistikën dhe udhëzimet e Policisë Rrugore“, njofton ARRSH.
