Nga Boldnews.al
Kryeministri Edi Rama bëri një mashtrim publik, kur dha justifikimin e radhës se përse qeveria e tij ka vendosur që të mbajë peng për 5 vjet diplomën e studentëve që përfundojnë Universitetin e Mjekësisë.
Në një takim partiak, të zhvilluar pasditen e kësaj të Premteje, Rama deklaroi se “Në Shqipëri është edhe Shkolla e Magjistraturës që e ka kusht që t’i mund të hysh në këtë shkollë, por nuk merr dot diplomën po nuk punove 5 vjet apo diçka më tepër si magjistrat. Shkolla e Magjistraturës është një nga shkollat më të mira në Shqipëri, por nuk është shkelur asnjë e drejtë kushtetuese dhe nuk është vënë asnjëherë në diskutim”.
Kjo deklaratë e kryeministrtit të vendit nuk mbështetet as në ligj, por edhe as në logjikën se si po funksionojnë aktualisht gjërat në sistemin e drejtësisë.
Ligji “Për statusin e gjyqtarëve dhe prokurorëve” parashikon si një ndër kriteret e pranimit në Shkollën e Magjistraturës të personave që kanë përfunduar Fakultetin Juridik dhe kanë “të paktën tre vjet përvojë profesionale aktive me kohë të plotë, në sistemin gjyqësor ose të prokurorisë, në administratën publike, profesionet e lira ligjore, mësimdhënie në fakultetet e drejtësisë, ose në çdo pozicion tjetër të barasvlershëm me to, në sektorin privat ose organizatat ndërkombëtare”.
Pra, ligji parashikon një detyrim me afat kohor vetëm për pranimin në Shkollën e Magjistraturës dhe në asnjë rast dhe për asnjë arsye nuk ka të parashikuar “bllokim” të diplomës së magjistratit (pra gjyqtarit apo prokurorit të ri) për 5 vjet.
Nga ana tjetër, nuk bën asnjë lloj sensi që të bllokohet diploma e magjistratit, kur, në një periudhë që sistemi ka nevojë emergjente për gjyqtarë e prokurorë të rinj, Këshilli i Lartë Gjyqësor (KLGJ) dhe Këshilli i Lartë i Prokurorisë (KLP) janë të prirur që të kryejnë emërimet e reja, për të plotësuar vakancat në gjykata e prokurori.
Dhe, një nga kriteret bazë për emërimet e reja në sistemin e drejtësisë është dorëzimi i diplomës së magjistratëve të rinj pranë KLGJ e KLP.
Gjithashtu, një “bllokim” i mundshëm i diplomës së magjistratëve për një periudhë 5-vjeçare, siç rreket të tregojë kryeministri Rama, nuk ka as logjikë dhe nuk mund të paralelizohet me vendimin e qeverisë ndaj studentëve të Mjekësisë.
Rama dhe kabineti i tij kanë vendosur që të “bllokojnë” diplomat e mjekëve të rinj, me qëllim që t’i pengojnë për t’u larguar jashtë Shqipërisë.
Në të njëjtën logjikë, Rama me të tijët do të duhej të vendosnin bllokimin e diplomave të magjistratëve të rinj për t’i penguar për t’u punësuar jashtë Shqipërisë.
Ndërkohë që mjekët mund të punësohen jashtë vendit, kush shtet do t’i pranojë, emërojë dhe pranojë në sistemin e tyre të drejtësisë magjistratët shqiptarë? Çdo vend ka rregullat e tij për rekrutimin dhe emërimin e gjyqtarëve dhe prokurorëve dhe, të paktën deri më tani, nuk është shënuar asnjë rast që një vend jashtë Shqipërisë të ketë “thithur” prokurorë e gjyqtarë nga vendi ynë.
Pikërisht, për shkak të mungesës së një parashikimi ligjor dhe mungesës së logjikës, deklaratat e Edi Ramës se magjistratëve të rinj u bllokohet diploma për 5 vjet, është thjesht një mashtrim i rëndomtë dhe një tentativë për të bindur opinionin publik se vendimi ndaj studentëve të Mjekësisë është vetëm një “rutinë|”.
Deklaratat e Ramës erdhën menjëherë pasi Gjykata Kushtetuese vendosi pezullimin e ligjit të propozuar nga kryeministri për të bllokuar diplomat e studentëve të Mjekësisë për një periudhë 5-vjeçare.
Vendimi i Gjykatës Kushtetuese nuk është përfundimtar dhe çështja pritet të shqyrtohet në themel. Ndaj, deklaratat e Ramës, më shumë se një mashtrim apo gafë ligjore e logjike, duket se janë një kërcënim publik për gjyqtarët kushtetues, të cilët nuk duhet të guxojnë t’ia nxjerrin ligjin si anti-kushtetues.
