Nga Boldnews.al
Një ish-zyrtar i arrestuar për korrupsion ka arritur të fitojë një tender nga Bashkia e Tiranës. Në fakt, Veliaj njihet për afrimitet apo edhe bashkëpunim me eksponentë të krimit, të akuzuar për vepra penale të ndryshme me të cilët vepron në fshehtësi. Por, kësaj herë ai ka dalë haptazi, pasi tenderin me vlerë 50 milionë lekë ia ka dhënë një ish-drejtori të IKMT-së të arrestuar në vitin 2021 në Burrel për korrupsion.
BoldNews.al ka siguruar dokumente nga Bashkia e Tiranës apo edhe Agjencia e Prokurimeve që faktojnë se Veliaj i ka dhënë firmës “Lurimi”, me pronar Lutfi Miftari, tenderin për pyllëzime në Zall Herr. Por, z.Miftari është arrestuar dhe më pas proceduar nga policia për korrupsion, gjatë kohës që ka drejtuar IKMT-në e Burrelit. Kur ishte drejtor, Miftari ia dhuroi aksionet vajzës së tij. Ndërkohë, kohët e fundit ai i ka rimarrë të gjitha aksionet dhe është pronar me 100 % të aksioneve.
Në shtator të vitit 2021, Policia e Shtetit lajmëroi se kishte finalizuar operacionin “Bankomati”. Në pranga ra Lutfi Miftari, 56 vjeç, i cili u arrestua në atë kohë për korrupsion, pasi mori ryshfet nga kompania private e kromit për të mos raportuar shkeljet e kryera nga kjo firmë. Policia lajmëroi në atë kohë se ryshfeti ishte 50 mijë lekë, ndërsa shuma u sekuestrua nga policia. Madje, në banesën e drejtorit u sekuestruan edhe 29.500 euro, 1300 dollarë dhe 896.000 lekë të rinj.
Ndërkohë, koha kaloi dhe emri i z.Miftari ka dalë sërish në “dritë”. Kësaj herë lidhet me tenderin e Bashkisë së Tiranës, që në datën 17 nëntor 2023 e ka shpallur fitues firmën “Lurimi” në procedurën “shërbim konsulence” për objektin “hartimi i planit të mbarështimit të ekonomisë pyjore Zall Herr-Priskë” në pronësi të Bashkisë Tiranë. Firma “Lurimi” me NUIS J68403912U ofroi 4.529.000 lekë pa TVSH, ose mbi 50 mijë euro, ndërsa firma tjetër në garë është s’kualifikuar nga tenderi.
Dokumenti i mësipërm është ekstrakti i Qendrës Kombëtare të Biznesit të firmës “Lurimi” që fitoi tenderin 50 milionë lekë të vjetra për shërbim konsulence në Bashkinë e Tiranës. Pronar dhe administrator është z.Lutfi Miftari, që ka emërim deri në nëntor 2027.
Ndërkohë, në dokumentet shoqëruese që janë mosha dhe të dhëna të tjera, mësohet se bëhet fjalë për të njëjtin person, ish-drejtorin e IKMT-së të arrestuar në 2021-shin për korrupsion. Në atë kohë, z.Miftari nuk ishte pronar i firmës, pasi aksionet ia kishte dhuruar një të afërmi. Kohët e fundit ai ka rimarrë të gjitha aksionet në formën e dhurimit. Dhe më pas do të bëjë konsulencë te Lali Eri për të pyllëzuar zonën e Zall Herrit.
