Saimir Patushi, ish-futbollisti i Vllaznisë, por jo vetëm, ka folur për situatën në kampin shkodran.
Në një intervistë për “Panorama Sport”, ai komenton lëvizjet e ndodhura si në pankinë, ashtu edhe në drejtimin teknik të klubit.
Ish-mesfushori është shprehur ashpër për atë situatë në të cilën ndodhet skuadra.
Ndërsa gabimet i shikon që në formimin e skuadrës.
Si e keni parë Vllazninë e këtyre javëve?
Vllaznia e këtyre javëve, ka vetëm emrin. Unë e theksoj se s’ka asnjë lidhje me çfarë emri ka Vllaznia. Kjo është gjynah.
Si e shihni lëvizjen e bërë për ndryshimin e trajnerit dhe drejtorit teknik?
Të them të drejtën, unë nuk besoj se do të luajnë trajneri dhe drejtori në këto momente të vështira që është Vllaznia me këta lojtarë që kanë afruar dhe që s’e meritojnë atë fanellë.
A mendoni se kanë qenë lëvizja e duhur në këto momente?
Ju thashë dhe pak më sipër, të dy nuk kanë shkopin magjik dhe nuk mund ta transformojnë ekipin në kaq pak kohë. Patjetër që të dy kanë vlera, por a do t’i lënë për të punuar? Kjo do të jetë dilema që unë kam.
A mendoni se, pavarësisht se ende nuk është ndjerë dora e trajnerit, do të ndryshojë situata te Vllaznia?
Nuk besoj se trajneri do të ketë dorë te ky kontingjent lojtarësh, sepse janë nën nivelin mesatar. Mbase unë do ta këshilloja të afrojë sa më shumë djem të akademisë ,që t’i fitojë për vitin e ardhshëm.
Sa kanë ndikuar mungesat te paraqitjet e skuadrës?
Të them të drejtën dhe ata pak lojtarë që e meritojnë fanellën, kur mungojnë besoj që bëhet një hendek i madh.
A është Vllaznia për katër vendet e para, apo duhet të bëjë kujdes për t’iu shmangur mbijetesës?
Besoj se ky vit do të jetë shumë i vështirë për Vllazninë. Unë i uroj që fati t’i buzëqeshë për Europën, por do ta ketë shumë të vështirë .
Për Vllazninë, ndërprerja shërbeu për mirë?
Mbase nga ana fizike u ka bërë mirë që lojtarët të cilët kanë qenë të dëmtuar të kthehen.
Ndaj Laçit besoni te kthesa e Vllaznisë?
Është ndeshje shumë e vështirë, por duhet të bëj kujdes sepse Laçi ka kundërsulm shumë të mirë dhe mund ta godasë Vllazninë.
Si e shihni kampionatin në tërësinë e saj?
Është kampionati më i dobët në 10 vitet e fundit. Shikoni sa spektatorë e ndjekin dhe pastaj vini vetë notën.
“Final 4” zgjidhja e duhur për kampionatin?
Nuk besoj që kjo skemë është e shëndetshme për kampionatin. Mbase është çmenduria e radhës e presidentëve dhe duan ta provojnë.
A e prisnit një sukses të ekipit tonë kombëtar, cili ishte ndryshimi i madh sipas jush?
Ekipi kombëtar është qershia mbi tortë e këtij fund viti dhe respekt për presidentin Duka. Respekt për trajnerin që ishte kryesori për këtë arritje respekt për lojtarët pavarësisht se meritonim një mbyllje tjetër në dy ndeshjet e fundit, por jemi në Berlin.
