Tefik Osmani nuk është më drejtori sportiv i Tiranës.
Lajmin e bën të ditur vetë ish-futbollisti përmes një postimi në Instagram.
Osmani ka falënderuar klubin ku përgjatë 3 viteve të fundit kanë ndarë së bashku sukseset por edhe kohët e vështira.
“Rrugëtimit tim të mrekullueshëm me KF Tiranën i erdhi fundi. Është ekipi që më dha shumë emocione, sfida dhe ndihem krenar që isha pjesë e këtij klubi të madh.
Falenderoj familjen Halili, stafin, lojtarët e mrekullueshëm gjatë 3 viteve ku ndamë gëzime dhe lot. Tifozët e mrekullueshëm që mbështesin ekipin e tyre në çdo rast. Jam krenar që m’u dha mundësia të shkruam me modesti emrin tim në këtë klub të madh”, shkruan Osmani.
Tefik Osmani e mbylli karrierën si futbollist pikërisht tek Tirana, pasi fitoi titullin kampion në sezonin 2019-2020 dhe nisi të ushtrojë rolin e drejtorit sportiv te bardheblutë.
Aventura e tij e parë në rolin e një drejtuesi ishte e suksesshme, pasi ish-mbrojtësi fitoi titullin kampion në sezonin 2021-2022.
Osmani largohet në një moment të vështirë për klubin i cili nuk po merr rezultatet e duhura duke qenë shumë larg kreut të tabelës.
