Gjykata e Tiranës ka vendosur sot pezullimin e çështjes për shqyrtimin e kërkesës së Lulzim Bashës për miratimin e Kuvendit Kombëtar të 2 Shtatorit, duke pranuar kërkesën e grupit të deputetëve të drejtuar nga Gazment Bardhi.
Gjyqtari Niko Rapi, ka konstatuar se pa u zgjidhur konflikti që është në Gjykatën e Lartë mbi Kuvendin Kombëtar të 11 Dhjetorit, nuk mund të zhvillohet dhe të konsiderohet i vlefshëm asnjë Kuvend Kombëtar i mëpasshëm apo Statut i ndryshuar.
Në këtë mënyrë, Statuti i dalë në 2 Shtator, përmes të cilit Lulzim Basha u caktua edhe Kryetar i Grupit Parlamentar nuk është njohur nga gjykata.
Grupi i deputetëve të mandatuar nga Këshilli Kombëtar i thirrur nga Gazment Bardhi si Sekretari i Përgjithshëm i PD është njohur si palë nga Gjykata e Tiranës.
Ata kanë kërkuar nga gjykata pezullimim e çështjes, kërkesë që është pranuar nga Gjykata e Shkallës së Parë Tiranë.
Përfaqësuesi ligjor i PD-së, Çlirim Gjata tha pas vendimit se “praktikisht ajo pjesë që e konsideron veten PD ka rënë”. “Është ajo që kam thënë që në fillim, të gjithë po vijnë tek ne. Edhe me kërkesën e fundit. Erdhën tek ne siç po vijnë të gjithë tek PD reale, atje ku është shumica”, tha Gjata në një prononcim për gazetarët.
Përfaqësuesi i grupit Bardhi, Marash Logu deklaroi se “ëndrra e Lulzim Bashës për t’u bërë kryetar i PD, kundër vullnetit të demokratëve, do vazhdojë të qëndrojë e mbyllur në sirtarin e Lindita Nikollës”.
Ndërsa përfaqësues të grupit të vulës u shprehën se “partia do të funksionojë në bazë të statutit të 2 shtatorit”.
