Detaje të reja kanë dalë në dritë nga vrasja e 34 vjeçarit shqiptar, Klaudio Myrtaj, në Itali.
Ngjarja ndodhi pasditen e së shtunës, ku i riu ishte duke punuar në një punishte kur është qëlluar me plumb në kokë dhe ka humbur jetën.
Hetimet e deritanishme nga Karabinierët, kanë përjashtuar që i riu të kishte lidhje me krimin apo qarqe të tjera kriminale. Kanë përjashtuar gjithashtu edhe pistat e krimeve të pasionit, larje hesapesh, vetëvrasje, borxhe të lojërave të fatit dhe lëndë narkotike.
Nga dëshmia paraprake e pronarit të punishtes, mësohet se ky i fundit kishte shkuar të mërrte benzinë me traktorin, në momentin që ka ndodhur krimi.
Hetuesit bëjnë me dije se Klaudio nga ora 15:10 deri në 15:15 shkoi të merrte cigare dhe më pas u kthye në punishte. Ndërsa sipas të tjera dëshmive disa persona e panë atë duke drekuar në një restorant në Vernante me mikun e tij, më pas iu bashkua edhe një familjar.
Dyshimet lidhen se autori mund të jetë dhe një i afërm i Klaudios, dikush që ai e njihte shumë mirë. Megjithatë deri më tani nuk është lëshuar një urdhër paraburgimi për asnjë nga personat që është parë pak para krimit, ndërsa priten zhvillime të mëtejshme.
