Milan nuk arriti të fitonte në transfertën me Leccen, pavarësisht se në pjesën e parë udhëhoqi me 2 gola.
Në fund kuqezinjtë u larguan vetëm me një pikë pas barazimit 2-2.
Pas sfidës foli edhe trajneri Pioli i cili u shfaq i pakënaqur.
“U nxituam në pjesën e dytë, u ngutëm. E qarkulluam pak topin dhe pësuam nga këndorja një gol të ngjashëm si kundër PSG-së. Duhej ta fitonim këtë ndeshje. Kur nuk arrin të mbyllësh takimin, atëherë duhet të shfaqesh kompakt në fushë. Kryem gabime, na mungoi kthjelltësia. Po humbasim pikë që na largojnë nga kreu. Është normale të jesh nervoz kur të rrëshqasin nga duart këto lloj ndeshjesh”, tha ai.
