Sekretariati i Etikës ka përjashtuar me 10 ditë tre deputetë të Partisë Demokratike, pas kërkesës së mazhorancës, e cila i konsideron si përgjegjës për kaosin e shkaktuar në seancën e kaluar plenare.
Masat disiplinore janë marrë për deputetët Saimir Korreshi, Elda Hoti dhe Lindita Metaliaj. Kujtojmë se Saimir Korreshi ndezi dy tymuese në Kuvend, ndërsa karriget e deputetëve të mnazhorancës ishin të përmbysura tek foltorja.
“Situata e përsëritur në çdo fillim seance plenare nga deputetë të opozitës duke penguar zhvillimin e rregullt të saj është e pa tolerueshme…Situata në sallën plenare u përkeqësua akoma më shumë kur deputeti Saimir Korreshi u pa të merrte disa tymuese nga çantat e dy zonjave deputete Elda Hoti dhe Lindita Metaliaj, duke i ndezur ato dhe duke e bërë të pamundur dhe të vështirë zhvillimin normal të rendit të ditës dhe diskutimet e deputetëve të regjistruar”, thuhej në kërkesën e socialistëve.
Kjo duket se është kthyer në rutinë tashmë që mazhoranca të përjashtojë me nga 10 ditë, disa prej deputetëve të PD-së pas çdo seance plenare. Opozita ka deklaruar se nuk do të lejojnë normalitetin në Kuvend deri në plotësimin e kërkesave të tyre.
