Tensionet kanë vijuar edhe këtë të martë në kryesinë e Kuvendit, ku deputetët e opozitës janë angazhuar në aksionin për bllokimin e aktiviteteve parlamentare.
Deputetët opozitarë kishin bllokuar derën e sallës së mbledhjeve të Komisionit të Medias. Në një moment, aty mbërrin deputetja socialiste Blerina Gjylameti. Për tu futur brenda, ajo shtyn me forcë deputetët e PD, Elda Hoti dhe Isuf Çela, që ndodheshin te dera.
Përplasje verbale ndërkohë edhe në sallën ku zhvillohen mbledhje e komisionit të ligjeve. Kryetarja e komisionit vendosi që mbledhja e kësaj të marte të zhvillohen online. Ndërkohë që disa deputetë socialistë ishin prezentë për të marrë pjesë online në mbledhje prej aty, në sallë futet ligjvënësi demokrat Saimir Korreshi, pjesë e këtij komisioni. Ai debaton me socialistët duke i kërkuar llogari se pse mbledhja zhvillohen online.
Deputetët demokratë bllokuan me karrige edhe hyrjen në sallën e komisionit të Sigurisë, duke mos lejuar futjen e socialistëve. Në këto kushte, ligjvënësit janë grumbulluar në korridor, ku kanë diskutuar dhe debatuar për situatën e krijuar. Pas disa minutave debate, kryetari i komisionit Nasip Naço ka njoftuar që mbledhja do të zhvillohet online.
Ndërkohë, kreu i PD Sali Berisha, gjatë një prononcimi për gazetarët jashtë ambienteve të kryesisë së Kuvendit tha se kryeministri Edi Rama po asgjëson parlamentin. Por Berisha theksoi se, “ata mund të fshihen virtualisht, por kjo është vetëm përkohësisht”. Po ashtu, ai tha se asgjë nuk ndal protestën e deputetëve gjer në sakrificat më të mëdha.
Deputetët demokratë janë angazhuar në bllokimin e punimeve të Kuvendit pasi shprehen se të drejtat e tyre po shtypen nga mazhoranca. Sipas opozitës, në mënyrë antikushtetuese, PS po pengon ngritjen e komisioneve hetimore të kërkuara nga PD si dhe po tenton të ‘përcaktojë’ opozitën duke refuzuar ndryshimet në komisionin e posaçëm të reformës zgjedhore.
