Këshilli Bashkiak në Durrës pritet të mblidhet pasditen e sotme për miratuar tarifat e reja të ujit. Çmimet e reja parashikojnë rritje të faturës për konsumatorët.
Opozita shprehet kundër duke deklaruar se me tarifat e reja të propozuara nga kryebashkiakja Emiriana Sako do të vidhen familjarët dhe bizneset.
“DORA E SHTETIT HYN EDHE MË THELLË NË XHEPAT TUAJ NGA SOT”, shprehet në një reagim në rrjetet sociale këshilltari i PD në Durrës Dorian Burgia.
“2 mijë lekë më shumë do paguajë çdo familje durrsake në faturën mujore të ujit. 3 mijë e 300 lekë më shumë çdo biznes. Justifikimi është se do të përmirësohet cilësia e ujit nga UKD. ÇFARË KA BËRË DERI SOT UKD? Edhe sa do i paguajnë shqiptarët shtetit për institucionet më të korruptuara? Kjo është thjeshtë dhe qartë GJOBVËNIE me ligj, në shtetin më të korruptuar në Europë. NXITIM I MADH PËR TA VENDOSUR NË REND DITE PËR KËTË JAVË, MIRATIM KËTË JAVË, VJEDHJE KËTË JAVË”, shton ai.
Ndërsa grupi i këshilltarëve të PL e quan rritjen e taksave për ujin, “turpin e radhës”.
“Kryetarja e Bashkisë Durrës propozon me nxitim jashtë radhë këtë tabelë të çmimit të ujit për familjarë e biznese! Turpi i radhës edhe pas shpalljes së falimentit të UKD nxjerr çmimet e larta, për të mbuluar vjedhjet edhe dështimet prej kaq vitesh! Mbledhja e KB Durrës propozohet të mbahet në errësirën e darkës së sotme”, thuhet në reagim.
