Një ngjarje e rëndë është regjistruar në Itali, ku një shqiptar ka vrarë me thikë bashkëshorten e tij, në qytetin e Ligurisë.
Viktima është shtetasja Etleva Bodi, 31-vjeçe, e cila ka ndërruar jetë në spitalin San Paolo në Savona dy ditë pasi u godit me thikë nga bashkëshorti i saj, Selami Bodi, 41 vjeç. Mediat italiane shkruajnë se 31-vjeçarja, nënë e katër fëmijëve ishte në terapi intensive, pork a ndërruar jetë në orët e para të mëngjesit të sotëm.
Çifti i shqiptarëve patën një konflikt gjatë natës së të premtes, për shkaqe xhelozie. Siç shkruajnë mediat italiane, Selami Bodi e kishte dëgjuar bashkëshorten të fliste në telefon me dikë dhe kishte hyrë në dhomë duke e kapur për fyti.
Më pas, e ka qëlluar me thikë, por kur ka vënë re se 31-vjeçarja ka humbur ndjenjat, ka lajmëruar urgjencën. E plagosur, ajo u dërgua në spital, por pas 48 orësh ndërroi jetë. Ndërsa autori i krimit të rëndë, një person pa precedentë penalë, u transferua në burgun Marassi, në Genova
Katër fëmijët e çiftit, të moshës nga 5 deri në 11 vjeç, janë ende të tronditur nga ngjarja dhe për momentin janë në duart e autoriteteve.
