Deputetja e PD-së, Albana Vokshi e ka konsideruar të gjithë procesin e SPAK kundër ish -kryeministrit Sali Berishës për çështjen e ish-kompleksit Partizani, tërësisht politik dhe në vijim të luftës që kryeministri Edi Rama po bën për të zhbërë opozitën.
Sipas Vokshit, Rama ka disa vite që përpiqet të asgjesojë opozitën
“Nuk është sulm ndaj Berishës si person, por si kryetar i opozitës. Edi Rama e nisi këtë proces për të mbajtur peng dhe asgjësuar opozitën. Ka disa vite që Rama përpiqet ta bëjë këtë. Pas aksionit opozitar të opozitës së vërtetë dhe jo opozitës që voton Ramën, nisi e gjithë kjo situatë. Heqja e të drejtës për komisionet parlamentare hetimore, emërimi i opozitës janë pjesë e strategjisë së Ramës për të zhbërë opozitën. Në vitet e fundit Rama ka tentuar të asgjesojë opozitën dhe kjo është në vijim të kësaj logjike”, tha Vokshi në emisionin “3D”.
Sipas saj, Rama ka ndikuar në ‘non gratën’ e Berishës me paratë e taksapaguesve, si dhe mban peng Lulzim Bashën.
“Është një gjyq i montuar politik. Pse anashkalohet Kuvendi dhe Kushtetuta?. Duhej ti drejtoheshin Kuvendit. Edi Rama po shmang Kuvendin dhe duket qartë që është proces politik. Prokurori dhe gjyqtaraja nuk iu drejtuan Kuvendit. Vendimi i gjykatës është antikushtetues. Kjo është dosje e sajuar si në kohën e Sigurimit të Shtetit. Drejtësia nuk është statistikë sa majtas, sa djathtas. Çfarë ka bërë Abi Malltezi që është arrestuar si kriminel? I ka të trashëguara nga të parët e tij pronat. Ka marrë pronë dhe ka zhvilluar pronën”, theksoi Vokshi.
