Jamarbër Malltezi është arrestuar nga policia këtë të shtunë, që ka ekzekutuar një masë sigurie arrest me burg të dhënë nga Gjykata e Posaçme me kërkesë të SPAK. Ai është ndaluar në Rinas lidhur me procedimin penal të privatizimit të kompleksit Partizani.
Një njoftim zyrtar nga SPAK pritet në vijim, teksa burime pranë Prokurorisë së Posaçme thanë se prokurorja Enkeleda Millonai ka ngritur ndaj tij akuzat për korrupsion pasiv dhe pastrim parash, kryer në bashkëpunim.
GJKKO ka vendosur sekuestro për disa pasuri të Malltezit, i cili sipas hetimeve, rezulton përfitues toke pas procedurës së privatizimit, përmes një procedure jo të rregullt ligjore.
Hetimi
Hetimi ka nisur në vitin 2020 pas një kallëzimi të Ministrit të Brendshëm Taulant Balla në lidhje me procedurat e ndjekura për privatizimin e pronës shtetërore “Klubi Sportiv Partizani” në Tiranë.
Në kallëzimin e depozituar nga Balla, asokohe kreu i grupit parlamentar të PS, akuzohen edhe ish-kryeministri Sali Berisha, si dhe ish-ministri i mbrojtjes, Arben Imami.
Në kuadër te hetimeve janë marrë në pyetje disa ish-zyrtarë të lartë si ish-ministrat Genc Ruli, Gazmend Oketa, Fatmir Mediu e të tjerë.
Procesi i privatizimit të kompleksit nisi në vitin 2008 dhe u finalizua pas 4 vitesh, në 2012-ën. Truall para vitit 2012 ishte në pronësi të Ministrisë së Mbrojtjes.
Hetimi i SPAK, ndërkohë, është cilësuar politik nga Berisha.
Masë sigurie për Berishën dhe ndërtuesin Bekteshi
Edhe për kreun e PD Berisha, gjyqtarja e Gjykatës së Posaçme Irena Gjoka ka caktuar në mungesë masën e detyrim paraqitjes si dhe i ka ndaluar lëvizjen jashtë vendit.
Po ashtu, masë sigurie detyrim paraqitje nga gjykata është dhënë edhe për ndërtuesin Fatmir Bektashi, firma e të cilit ka kryer ndërtimet te trualli i ish-kompleksit shtëror, ku tashmë ngrihet një kompleks banimi.
Sali Berisha akuzohet nga prokuroria për korrupsion pasiv në bashkëpunim.
Ndërsa për ndërtuesin Bekteshi janë ngritur akuzat e korruspionit aktiv dhe pastrimit të parave në bashkëpunim.
