Partizani dhe Tirana në pothuajse 15 kampionatet e fundit luajnë në javën e 6-të, por e veçanta është se derbi vishet bardheblu sa herë luhet në tetor.
Të paktën në dy dekadat e fundit kanë qenë bardheblutë, të cilët kanë dominuar sfidat e kampionatit dhe një në Kupën e Shqipërisë.
Nga 1996-ta janë gjashtë sfida të luajtura mes skuadrave të kryeqytetit, nga ku katër janë fituar nga Tirana dhe vetëm dy nga Partizani. Ndeshjet e fundit të luajtura në tetor janë dominuar nga Tirana, ndërkohë që takimet përkojnë me dy kampionatet më të afërta të luajtur.
Koincidenca është edhe për faktin që Tirana ka mundur të fitojë sfidën e parë derbi nga katër takimet që luajnë në një sezon të kuqtë dhe bardheblutë. Golashënuesit e tetorit në derbi janë Xhixha dhe Limaj për Tiranën.
Fitoret e Partizanit – Për të gjetur një fitore të Partizanit duhet që të kthehemi pas në kohë, më saktë më 3 tetor 2015, ku të kuqtë fitonin me golin e Sukajt dhe një vit para 2015-ës me atë të Demirit.
Gjithsesi, derbi më i largët i tetorit shënohet më 29 tetor 2005 me Tiranën si pritëse që fitonte 1-0 dhe në fushë vendoste Devi Muka. Për statistikë, derbi tjetër në tetor është luajtur edhe për Kupën e Shqipërisë, ndërkohë që dominues kanë qenë sërish bardheblutë, që u kualifikuan dhe në atë sfidë golin e shënoi Mirel Çota.
Gjashtë derbe – Këtë sezon, Partizani dhe Tirana mund të luajnë rekordin e ndeshjeve. Plot shtatë.
Kështu, bardheblutë dhe të kuqtë do të luajnë katër herë në kampionat, 2 herë në Kupën e Shqipërisë nëse përballen në gjysmëfinale dhe një herë tjetër në “Final Four”.
Kujtojmë që sezonin e shkuar dy skuadrat ndanë titullin vetëm për shkak të ndeshjeve direkte, pasi kishte fituar dy herë derbin.
