Një 37-vjeçar nga Saranda ka përfunduar ditën e sotme në spital, i plagosur rëndë me goditje të shumta në trup.
Burime bëjnë me dije se bëhet fjalë për shtetasin Leonard Poçi, i cili është plagosur me thikë pas një konflikti me shtetasi Dhimitër Terolli, rreth 32 vjeç. Ngjarja ka ndodhur rreth orës 21:10, në lagjen nr.1 të qytetit bregdetar.
Policia ka bërë të mundur kapjen e autorit të dyshuar, shtetasin Dhimitër Terolli, dhe shoqërimin e tij në Komisariatin e Sarandës, për veprime të mëtejshme hetimore.
Poci ka marrë disa goditje me thikë në pjesën e qafës, shpinës dhe te duart. Ai po merr ndihmë mjekësore në Urgjencën e Spitalitë të Sarandës, ndërkohë që fatmirësisht ndodhet jashtë rrezikut për jetën.
Vijon puna e grupit hetimor për sqarimin e plotë të rrethanave të ngjarjes.
Raportohet se 37-vjeçari i plagosur është përdorues i lëndëve narkotike, si edhe ka precedentë të mëparshëm penalë për vjedhje.
Më 1 mars të vitit 2023, Poçi u arrestua pasi iu gjet një sasi e vogël “cannabis sativa”. Në maj të vitit 2021, ai u vu në pranga për vjedhjen në bashkëpunim të një automjeti në Sarandë.
Gjithashtu, 36-vjeçari u arrestua në qershor të vitit 2017 pasi vodhi një celular, ndërsa në qershor të vitit 2015, vodhi sende në dy automjete dhe celularin e një avokati në Sarandë.
