Një aksident tragjik ka ndodhur mbrëmjen e kësaj të marte në Mestre, në provincën e Venecias, Itali. Mediat vendase bëjnë të ditur se një autobus me turistë ra nga mbikalimi “Vempa” duke përfunduar në shinën hekurudhore që shkon përgjatë rrugës. Bilanci paraprak flet për të paktën 21 viktima (mes tyre dy fëmijë) dhe 40 të plagosur.
Menjëherë pas përplasjes, autobusi me lëndë djegëse metan ka marrë flakë. Në vendngjarje kanë ndërhyrë zjarrfikësit së bashku me ekipet e emergjencës dhe policinë.
Le prime immagini dell’incidente a #Mestre dove hanno perso la vita almeno 20 persone#StaseraItalia pic.twitter.com/4D0Uir0urP
— Stasera Italia (@StaseraItalia) October 3, 2023
Për momentin nuk dihen rrethanat e aksidentit. Lëvizja në linjën hekurudhore mes Mestres dhe Venecias u pezullua për shkak të aksidentit.
Autoriteti Shëndetësor Vendor i Venecias ka aktivizuar protokollin e “urgjencave të mëdha”, i cili përfshin vënien në dispozicion të të gjitha dhomave të urgjencës spitalore dhe thirrjen e personelit përforcues në punë.
Viktimat janë ende të paidentifikuara.
#Mestre #cavalcavia https://t.co/ESLY6qIfRI
— Linda (@lindaeCiaoCiao) October 3, 2023
Lidhur me ngjarjen ka reaguar edhe kryeministrja italiane Giorgia Meloni. “Shpreh ngushëllimet më të thella personale dhe të qeverisë për aksidentin e rëndë që ndodhi në Mestre. Mendimet tona shkojnë për viktimat, familjen dhe miqtë e tyre. Jam në kontakt të ngushtë me kryebashkiakun Luigi Brugnaro dhe ministrin Matteo Piantedosi për të ndjekur lajmet mbi këtë tragjedi“, shprehet Meloni.
Edhe kryebashkiaku i Venezias Luigi Brugnaro e cilësoi ngjarjen një tragjedi të madhe, ndërsa skenën e përshkroi si apokaliptike. “Një tragjedi e madhe ka goditur mbrëmjen e sotme komunitetin tonë. Kam caktuar menjëherë zinë qytetare, në nder të viktimave të shumta që ndodheshin në autobusin e rënë. Një skenë apokaliptike, nuk ka fjalë për ta përshkruar”, shkruajti ai.
