Nga Boldnews.al
Të dhënat zyrtare tregojnë se ekziston një raport shumë të veçantë ndërmjet Komisionit të Prokurimit Publik (KPP) dhe kompanisë private “Alko Impeks General” të menaxhuar nga Arbër Abazi.
Nga gjashtë procedura të ankimuara pranë shkallës së dytë të tenderave që përfshijnë kompaninë e familjes Abazi përgjatë periudhës 2022-2023, të gjitha kanë shkuar në favor të “Alko Impeks General”.
“Boldnews.al” ka konsultuar vendimet e KPP-së në dy vitet e fundit, nga ku rezulton se në katër raste janë pranuar ankimet e shoqërisë së Arbër Abazit dhe në dy të tjera janë refuzuar ankimet e kompanive të tjera kundër “Alko Impeks General”.
Pra, qartësisht duket se për periudhën 2022-2023, shoqëria e familjes Abazi ka marrë një rezultat 100 përqind pozitiv në Komisionin e Prokurimeve Publike.
Ka nga ata që besojnë se ky “fat” i kompanisë “Alko Impeks General” lidhet me qasjen pozitive ndaj saj të drejtuesit të KPP-së, Jonaid Myzyri.
Kryetari i Komisionit të Prokurimit Publik u zgjodh në këtë detyrë në korrik të vitit 2020, me votat e deputetëve të Partisë Socialiste të Edi Ramës.
Sipas biografinë së tij profesionale, të dorëzuar gjatë periudhës së kandidimit, Myzyri deklaronte se kishte qenë shef i zyrës së prokurimeve në Ministrinë e Infrastrukturës, e më herët inspector në Komisionin e Prokurimeve Publike dhe lector në Universitetin Amerikan të Tiranës.
Në CV-në e tij nuk shënohet asnjë lloj angazhimi në sektorin privat. Por, Partia Demokratike në opozitë, disa muaj pas emërimit të tij në krye të KPP-së, e akuzoi Myzyrin se po favorizonte shoqërinë ‘Alko Impeks General” të familjes së ish-deputetit socialist, Sadri Abazi.
Përfaqësues të opozitës deklaruan se ky favorizim vinte nga fakti që Joanid Myzyri kishte punuar më herët si jurist në këtë kompani private.
Kjo e dhënë nuk gjendet në biografinë zyrtare të Myzyrit. Gjithashtu, ai nuk ka dhënë asnjë shpjegim publik dhe as nuk i ka mohuar akuzat e opozitës, duke lënë të kuptohet se janë të vërteta të dhënat për raporte bashkëpunimi professional mes tij dhe “Alko Impeks General”.
Vendimet pro Abazit
– Në datë 3 gusht 2023, Komisioni i Prokurimit Publik, nën drejtimin e Jonaid Myzyri, ka marrë në shqyrtim kërkesën për shfuqizimin e vendimit për skualifikimin e ofertës së “Alko Impeks General Construction” nga procedura për “Rikonstruksionin e Spitalit Rajonal Dibër”, me fond limit 325.049.984 lekë të reja, të zhvilluar nga Drejtoria e Spitalit Rajonal
Në përfundim, KPP vendosi të pranojë pjesërisht kërkesën e “Alko Impeks General”.
– Në 3 maj 2023, KPP mori në shqyrtim kërkesën e kompanisë “Albavia” për skualifikimin e ofertës së kompanisë “Alko Impeks General” nga procedura tenderuese me objekt “Loti IV, Ura e Zëmçës – Kryqëzimi Proptisht, Bishnicë”, me fond limit 220.320.000 lekë të reja, të zhvilluar nga Bashkia Pogradec.
Në përfundim, KPP vendosi pushimin e çështjes, duke lënë në fuqi fitues kompaninë “Alko Impeks General Construction”.
– Në 10 nëntor 2022, KPP mori në shqyrtim ankesën kundër skualifikimit të ofertës së paraqitur nga “Alko Impeks General” në procedurën “Shërbimi i Pastrimit dhe largimit të mbeturinave për Bashkinë Vorë”, me fond limit 273.460.221 lekë të reja.
Në përfundim, KPP, nën drejtimin e Jonaid Myzyri vendosi të pranojë ankesën e “Alko Impeks General”.
– Në 16 maj 2022, KPP shqyrtoi ankesën e “Alko Impeks General” për skualifikimin e ofertës së saj nga tenderi “Shërbimi i pastrimit të territorit të Bashkisë Himarë”, me fondi limit 289.674. 042 lekë të reja.
Edhe në këtë rast, KPP vendosi të pranojë ankimin e shoqërisë “Alko Impeks General”.
– Në 28 janar 2022, Komisioni i Prokurimit Publik shqyrtoi ankesën e kompanive “GPG” dhe “Korsel”, të cilat kërkonin skualifikimin e ofertës së shoqërisë ‘Alko Impeks General Construction” nga tenderi “Shërbimi i pastrimit dhe grumbullimi i mbetjeve urbane në Bashkinë Lushnje”, me fond limit 49.968.489 lekë të reja.
Në këtë rast, KPP e drejtuar nga Myzyri vendosi të mos pranojë ankimin, duke lënë në fuqi vendimin për shpalljen fitues të shoqërisë së familjes Abazi.
– Në tetor 2021, KPP pranoi kërkesën e kompanisë “Alko Impeks”, e cila ankohej për skualifikimin nga procedura me objekt “Shërbimi i pastrimit dhe largimit të mbeturinave (mbetjeve urbane) në Njësitë Administrative dhe kryerja e shërbimit të mirëmbajtjes së varrezave publike në Njësitë Administrative të Bashkisë Fier”, me fond limit 198.984.172 lekë të reja.
