Ish-kryeparlamentarja Jozefina Topalli zgjedh 22 marsin për të sulmuar kryedemokratin Lulzim Basha, duke e cilësuar si person i cili ka uzurpuar partinë. Ajo ka renditur disa nga fitoret e mëdha sipas saj të PD-së, që solli në vend votën e lirë, mposhti komunizmin, liberalizoi vizat dhe futi vendin në NATO. Megjithatë ish-kryeparlamentarja rrezikun aktual të PD-së dhe opozitarizmit në Shqipëri e sheh tek një emër i vetëm, kryetarin e saj Lulzim Basha.
“Brenda PD-së, forcës politike që solli votën e lirë, sot nuk ka më zgjedhje, nuk ka më forume, nuk ka më statut, nuk ka më debat…, të gjitha janë farsë! Dhe kjo është vetëm njëra anë. Pas 26 vitesh Lulzim Basha ka zhdukur jo vetëm të djathtën, por opozitën si garancinë kryesore të qytetarëve për t’i dalë zot lirive si dhe të drejtave të tyre ekonomike, politike e sociale”-shkruan Topalli, në faqen e saj në facebook.
Ajo ka thumbuar me batuta të së shkuarës Bashën, duke e akuzuar se pas 26 vitesh Lulzim Basha kërkoi shfuqizimin e 20 Shkurtit, datës së rrëzimit të shtatores se diktatorit. “Pas reagimeve të forta projetligji u tërhoq ,me justifikime tamam si dikur; ku njëri bente autokritikë të thellë (si dikur në plenume), ndërsa LB, si gjithmonë nuk dinte asgjë, dhe i habitur për çfarë po dëgjonte, tamam si Pal Vata kur thoshte: “Pasha t’madhin zot, unë e Enveri s’dimë gja, ne pastë ba Mehmeti, me krye të vet!”-sulmon Topalli.
