Pas 4 vitesh mbjellje së dhjetëra palmave në hyrje të qytetit të Kavajës, të gjitha pemët dekorative janë tharë duke çuar dëm miliona lekë të investuara në kuadër të projektit të “Rilindjes Urbane”.
Dëmi financiar është njëra anë e medaljes pasi trungjet e kalbura të palmave janë kthyer në një rrezik real për jetën e banorëve.
Kjo situatë e trashëguar ka vënë në lëvizje bashkinë e qytetit, e cila ka nisur me urgjencë shkuljen e palmave të thara në rrugën hyrëse të qytetit për t’i paraprirë çdo aksidenti të mundshëm.
Gabimi i bërë në hyrje të qytetit është edhe më i dukshëm në qendrën e rikonstruktuar të Kavajës, që rrethohet nga palma dy herë më të larta se në rrugën hyrëse.
Në pamje të parë pemët duken të shëndetshme dhe të gjelbëruara por ato kanë rezultuar shumë të brishta përballë temperaturave të ulëta, stuhive të shiut dhe erës sikundër dëshmojnë këto pamje të filmuara në korrik të 2017.
Në të paktën 5 raste raportohen pemë të rrëzuara në tokë ose mbi automjete të parkuara në bulevardin kryesor të qytetit ku fati ka qenë në anën e qytetarëve. Për të mos ripërsëritur gabimin e projektuar nga të majtët, drejtuesit aktual të bashkisë kanë vendosur që të përfshinë qytetarët në përzgjedhjen e pemëve të reja dekorative.
Mbjellja e palmave në qytetin e Kavajës ishte pjesë e Projektit të qeverisë Shqiptare “Rilindja e Qendrave Urbane” përmes të cilit u realizua rikonstruksioni total i sheshit para xhamisë, bulevardit numër 1 si dhe kompleksit të dyqaneve të vjetra në krah të xhamisë.
Ky projekt i kushtoi buxhetit të shtetit afër 5 milionë euro, shumë të cilës do t’i shtohen edhe miliona lekë të tjera për të zëvendësuar palmat e thara si dhe defekte të tjera të konstatuara në investimet infrastrukturore.
