Pas 3 humbjeve radhazi, Skënderbeu është rikthyer te fitorja në kampionat, teksa kanë mundur në “Arena Egnatia” të Rrogozhinës, Erzenin me rezultatin 1-2.
Në minutën e 20-të, Rashica fiton penallti pasi u pengua nga Atanda dhe pas verifikimit me VAR u akordua 11-metërsh.
Nga pika e bardhë u tregua i saktë Liço, i cili dërgoi topin pas shpinës së portierit.
Pas disa minutash pati përsëri penallti për korçarët, pasi Nikaj u rrëzua në zonë. Liço këtë herë gjeti vetëm shtyllën, por 11-metërshi u përsërit pasi lojtarët e Erzenit prekën zonën e 16-metërshit.
Në tentativën e radhës, portieri Hasanbelli neutralizon sferën, me Liçon që nuk i beson syve për gabimin e bërë.
Goli i sigurisë për Skënderbeun erdhi vetëm në minutën e 70-të, teksa Shaqe u kordinua mirë me kokë, për të ndëshkuar Hasanbellin.
Në fund goli i shijakasve (Amir Kahrimanovic me penallti) vlejti vetëm për statistikë, pasi fati i takimit ishte vendosur tashmë.
Falë kësaj fitoreje, Skënderbeu ngjitet në vendin e 3-të të renditjes me 9 pikë pas 6 javëve kampionat, 1 pikë më pak se Egnatia e Tirana, që kryesojnë Superioren.
Në krahun tjetër,, Erzeni mbetet në vendin e 6-të të renditjes, me 8 pikë pas 6 javëve të para.
Një fakt interesant është që kjo ishte ndeshja e parë në histori mes dy klubeve.
Kurrë më parë këto dy skuadra nuk ishin përballur me njëra-tjetrën, qoftë në Superiore, në Kategorinë e Parë e më poshtë, madje as në miqësore.
