Një 38-vjeçar është qëlluar për vdekje me armë zjarri nga persona ende të paidentifikuar në Katund Sukt (Durrës), tek shinat e trenit, rreth mesnatës.
Viktima është Fatjon (Toni) Dervishi, me banim në Sukth, i cili ndërroi jetë në spital.
“Në Katund, Sukth, tek shinat e trenit, nga persona ende të paidentifikuar është qëlluar me armë zjarri shtetasi F.D, 38 vjeç, i cili u transportua menjëherë në spital për ndihmë mjeksore, por si pasojë e plagëve të marra ka ndërruar jetë në spital”, tha policia në një njoftim paraprak. Më vonë, konfirmoi se vrasja ndodhi rreth orës 23:45.
Prita
Viktimës dyshohet se i është zënë në pritë tek shinat e trenit në Sukth dhe është qëlluar me breshëri plumbash, teksa ishte nën drejtimin e një automjeti.
Në momentin kur e kanë qëlluar, ka qenë në automjet së bashku me një shokun e tij. Personi tjetër nuk është prekur nga plumbat. Sipas dëshmisë së këtij të fundit, rezulton se ata kishin qenë në një lokal dhe po ktheheshin për në shtëpi kur janë goditur. Janë pyetur 7 persona deri tani për të mundësuar zbardhjen e ngjarjes.
Kjo e sotmja vrasja e dytë e shënuar në vend pa kaluar 24 orë. 59-vjeçari Martin (Marku) Bardhi u ekzekutua paraditen e 26 shtatorit, në një atentat të mirëorganizuar në hyrje të qytetit të Rrëshenit, ndërsa tre persona të tjerë të cilët ishin në shoqërinë e tij u plagosën. Vrasja u shënua pranë komisariatit të Rrëshenit në lokalin e viktimës.
Dyshimet
Hakmarrja është një nga pistat ku janë përqëndruar hetimet për zbardhjen e vrasjes së 38-vjeçarit Fatjon Dervishi.
Vëllai i tij është i akuzuar për zhdukjen e një personi. Ngjarja ka ndodhur jashtë kufijve të Shqipërisë, ndërsa hetuesit nuk përjashtojnë që ekzekutimit të ketë lidhje me këtë ngjarje. I vëllai i viktimës ndodhet në burg, ndërsa ka qenë i ka qenë i përfshirë në një grup kriminal në Spanjë që merrej me grabitje të magazinave të drogës. Dyshohet gjithashtu për zhdukjen e një personi atje, të identifikuar si Tauland Malshi. Me pas, u zhvendos në Durrës ku u arrestua për plagosjen e një vajze në hotel në Janar 2022 dhe tashmë ndodhet në burg për këtë ngjarje.
Po hetohet po ashtu lidhur me konfliktet e mundshme që mund të ketë pasur vetë 38-vjeçari, i cili ka qenë i dyshuar për drogë dhe krime ndaj personit dhe pronës, por asnjëra prej këtyre nuk i është provuar. Raportohet se Dervishi jetonte në Gjermani, ku ishte i martuar me një shtetase rumune dhe kishte dy fëmijë, ndërsa aktiviteti i tij jashtë vendit mbetet i dyshimtë.
Policia konfirmoi se viktima “ka qenë hetuar në Holandë, për trafikim të lëndëve narkotike”.
Në kuadër të hetimeve, blutë konfirmuan se “janë sekuestruar kamerat e sigurisë me pamje nga aksi rrugor Maminas – Shijak – Sukth – Sallmone (aksi që kishte ndjekur shtetasi viktima). Gjithashtu janë kryer një sërë veprimesh të tjera hetimore si kontrolle banesash, janë këqyrur celularë, si dhe është bashkëpunuar me ZQK Interpol Tiranën, për të identifikuar lidhje shoqërore të viktimës apo shtetas me të cilët mund të ketë pasur konflikte, jashtë vendit. Gjithashtu, janë sekuestruar automjeti që ai drejtonte dhe 2 celularët e tij dhe vijon ekzaminimi i tyre.
