Mund të thuhet me plot gojën që vetëm fati ka ndihmuar që bilanci i përballjes mes forcave të Policisë dhe Klered Bozhanaj, ku mbeti i plagosur efektivi Edlir Alleshi, të mos rëndohej më shumë.
“Boldnews.al” ka mësuar detajet e plota mbi dinamikën e ngjarjes së ndodhur mbrëmjen e së Mërkurës në zonën pranë ish-Kinostudios në Tiranë.
Të dhënat dëshmojnë më së paku për paaftësi totale profesionale të forcave “Shqiponja”, në menaxhimin e një situate serioze.
Çfarë ndodhi?
Dy grupe “Shqiponja”, nga ata që shihen shpesh rrugëve të Tiranës duke qarkulluar mbi motor, duke kryer inspektime rutinore, kanë pikasur një person që kryente lëvizje të dyshimta.
Njëri motor me dy efektivë ka ndaluar pranë këtij individi, ndërsa dy policët e tjerë kanë ndaluar motorin rreth 20 metra më tej.
Punonjësi i Policisë, Edlir Alleshi dhe kolegu i tij kanë zbritur të parët nga mjeti dhe i kanë bërë thirrje personit të dyshimtë, i identifikuar më pas si Klered Bozhanaj, që të ndalonte dhe t’i nënshtrohej kontrollit.
Bozhanaj, për të cilin thuhet se ka probleme të shëndetit mendor, është kthyer nga punonjësit e policisë dhe ka qëlluar me një pistoletë që e mbante në duar. Dy plumba kanë kapur në bark efektivin Edlir Alleshi, duke e lënë të plagosur përpara një lokali.
Ndërkohë, kolegu i tij, pasi ka dëgjuar krismat, nuk ka reaguar aspak, duke u futur menjëherë në ambjentet e brendshme të lokalit.
Po ashtu, edhe dy efektivët e tjerë, të cilët ishin rreth 20 metra larg vendit të ngjarjes, gjithashtu janë fshehur menjëherë, pa ndërmarrë asnjë reagim parandalues të autorit të dhunshëm.
Autori Bozhanaj është larguar qetësisht, ndërkohë që efektivët vijonin të qëndronin të fshehur. Ata nuk e kanë parë lëvizjen e autorit të ngjarjes, Klered Bozhanaj.
Ky i fundit, është drejtuar për në pallatin ku banonte aty pranë, por nuk është futur në hyrjen e tij, por në një hyrje ngjitur.
Ai ka qëndruar aty për shumë orë, ndërkohë që punonjësit e policisë nuk e dinin vendndodhjen e tij, pasi efektivët në vend-ngjarje ishin fshehur dhe nuk panë asnjë prej lëvizjeve të autorit.
Pas ngjarjes, Drejtori i Policisë së Tiranës, Tonin Vocaj, deklaroi se po kryheshin kërkime për gjetjen e autorit në kryeqytet, por edhe në zona të tjerë, përfshirë Elbasan, Durrës e të tjerë dhe se ofrohej një shpërblim prej 20 mijë euro për këdo që jepte informacion mbi vendndodhjen e Klered Bozhanaj.
Në fakt, siç rezultoi më vonë, autori i ngjarjes kriminale gjendej vetëm pak hapa larg shtëpisë së tij dhe ai u arrestua, ndërkohë që vendosi të rikthehej në banesë, ku e prisnin kolegët e policit të plagosur, Edlir Alleshi.
Dinamika e ngjarjes së ndodhur në zonën e ish-Kinostudios tregon më së paku paaftësinë e repartit policor “Shqiponja”, të cilët, mbi motor tregojnë “rreptësinë e ligjit” mbi qytetarët, por nga ana tjetër dështojnë në mënyrë spektakolare për të shmangur personat e rrezikshëm, më së pari të atyre që kërcënojnë jetën e vetë atyre.
