Një qendër call center-i është zbuluar nga policia në Tiranë, të cilët mashtronin shtetas të huaj, nëpërmjet telefonit, për të investuar në bursa fiktive.
Si rezultat, policia ka rrestuar dy administratorë të subjektit dhe ka shpallur në kërkim dy administratorët e tjerë. Më konkretisht, në kuadër të operacionit policor të koduar “Momentum” janë vënë në pranga shtetasit B. K., 27 vjeç, dhe M. K., 25 vjeç, të dy banues në Tiranë; si dhe janë shpallur në kërkim shtetasit J. K., 51 vjeçe, dhe E. K., 32 vjeç.
“Këta 4 shtetas kishin në administrim një call center në Rrugën e Zallit, në të cilin ishin të punësuar rreth 60 punonjës, të cilët, së bashku me administratorët, telefononin shtetas të huaj, kryesisht italianë, iu prezantoheshin si agjentë shitjesh dhe përmes mashtrimit, i bindnin ata që të investonin në bursën fiktive Forex.
Gjatë operacionit u gjetën dhe u sekuestruan në cilësinë e provës materiale: 68 000 euro, njësi kompjuterike, aparate celulare, tabletë, mandate pagesash dhe blloqe me të dhëna të ndryshme të shtetasve të huaj që dyshohet se janë mashtruar, për të investuar në bursa fiktive.” – thuhet në njoftimin e Policisë.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
