Gjykata e Posaçme vendosi sot të kalojë për gjykim dosjen “Beleri”.
Avokati i Belerit u shpreh se klienti i tij po mbahet në burg politikisht dhe duhej liruar të bënte betimin si kryetar i bashkisë Himarë.
Për avokatin, Beleri nuk ka asnjë lidhje me shit-blerje vote, për të cilën u akuzua nga Prokuroria e Vlorës. Gjithashtu ai shtoi se çështjen do ta dërgojë në Gjykatën e Lartë dhe Gjykatën Kushtetuese.
“Fredi Beleri tha se po qëndron në burg politikisht dhe pa asnjë provë, pasi nuk ka pasur asnjë kontakt që nga data 6 edhe deri në ditën që është arrestuar me të infiltruarin. SPAK vazhdon të shprehet se akuzat e ngritura ndaj Belerit janë të vërtetuara. Ne do i kontestojmë këtë punë kemi, seanca tjetër është ditën e hënë. Argumenti ishte se kanë përfunduar hetimet dhe s’ka rrezik më për marrjen e provave dhe s’ka pse të ndiqet më në gjendje arresti në burg, kur gjyqi do vazhdojë gjatë. Ne i jemi drejtuar edhe GJykatës së Lartë pastaj sa të marrim përgjigje do shkojmë dhe në Gjykatën Kushtetuese”, tha avokati i Belerit në një prononcim për gazetarët pas përfundimit të seancës.
