Është shoqëruar me debate të ashpra në parlament ndryshimi i kryesisë së grupit parlamentar të PD-së në Kuvend.
Ishte kryetarja e Kuvendit Lindita Nikolla ajo e cila deklaroi se kryatari i Partisë Demokratike Lulzim Basha i është drejtuar me një letër Kuvendit për ndryshimet në përfaqësimin e grupit parlamentar të PD-së në Kuvend.
Basha i ka deleguar kompetencën e krytares së grupit parlamentar të PD-së deputretes Flutura Açka.
“Ka njoftim për ndryshimin e kryesisë së grupit parlamentar të PD. Me propozim të kryetarit të Partisë vendosi përbërja e kryesisë së grupit parlamentar të PD është Flutura Açka, nënkryetar e autorizuar për përfaqësimin e grupit parlamentar në mungesë të kryetarit të grupit, Kreshnik Çollaku nënkryetar, Arbi Agalliu sekretar, Oriola Pampuri zëdhënëse”, deklaroi kryeparlamentarja Lindita Nikolla.
Njoftimi i vendimit të Lulzim Bashës bëri që Gazmend Bardhi të përplasej me Nikollën, duke i thënë se po shkelte rregulloren, pasi vendimet për përfaqësimin në parlament e merr grupi parlamentar.
Ai citoi një shkresë të dërguar prej tij Kuvendit ku thuhet se grupi parlamentar i PD nuk ka bërë asnjë ndryshim të kryetarit.
Bardhi theksoi se nuk është detyrë e PS që të caktojë se kush e drejton grupin e PD. “Për anëtarët e grupit të PD është e papranueshme që maxhoranca të ndërhyjë në punët e brendshme të grupit parlamentar të PD-së”, tha Bardhi.
Për shkak të toneve të ashpra të Bardhit, kryetarja e Kuvendit i kërkoi atij të ruante qetësinë, duke e paraljmëruar se në të kundërt mund të nxirrej jashtë.
“Mos përplas tavolinën se ju nxjerr jashtë! Ju thashë dhe po përsëris edhe njëherë me shumë qetësi, mendoja se shkresa që kishit dërguar ishte personalisht për mua, jo për të njoftuar Kuvendin. Ishte një shkresë që impaktonte grupin parlamentarë të Partisë Demokratike. Jeni konfuz dhe po krijoni një situatë të paprecedente për publikun”, tha Nikolla.
