Trofeu i parë i sezonit 2023-2024 në volejbollin e femrave ka shkuar në qytetin e Korçës.
Pasi kishte mundur të shtunën në gjysmëfinale Tiranën me rezultatin 3-1, Skënderbeu ka likuiduar me të njëjtin rezultat edhe Partizanin në finalen e luajtur ditën e diel në Farkë, duke bërë të tijën Kupën e FSHV-së.
Pas një takimi që zgjati mbi 2 orë, ishin korçaret ato që festuan, duke vijuar kështu serinë e sukseseve të edicioneve të fundit në sportin e rrjetës. Me 4 lojtare të huaja në përbërje përballë një Partizani krejtësisht “bio” me vendore, skuadra juglindore tregoi një nivel më të lartë loje.
Ishte Skënderbeu që e nisi më mirë takimin, duke marrë një epërsi që në pikët e para. Partizani provoi të reagonte, ndërsa fundi i setit të parë u bë shumë interesant.
Por me një bllok fitues kapitenia Elena Bego, fiksoi shifrat 25-23 në favor të korçareve në setin e parë. Edhe seti i dytë nisi më mirë për miket, por më pas kampionet e Shqipërisë, të cilat drejtohen nga trajnerja Amarilda Prenga, morën kontrollin e lojës, duke e fituar setin 25-20, për të vendosur baraspeshën 1-1 me sete. Fraksioni i tretë startoi me rivalitet të lartë, por gradualisht korçaret krijuan epërsinë për ta fituar setin 25-21.
Edhe në setin e tretë ndeshja ka shumë rivalitet, ndërsa në momentet kyçe përsëri është Skënderbeu që tregohet më i kthjellët. Në fund një gabim nga Joana Kushi, fikson shifrat 25-20 të setin dhe vulos ndeshjen 3-1 për korçaret.
Ana Fasuleva me 19 pikë, Maria Vivas me 16 dhe Paola Gjata me 11 ishin lojtaret me rendimentin më të lartë në sulm për Skënderbeun. Për Partizanin spikatën Xhovana Kaçorri me 14 pikë, Kejsi Shira me 12 dhe Joana Kushi me 11.
Në përfundim të finales, ishte radha e ceremonisë, me kreun e FSHV-së, Erlind Pëllumbi, që i dorëzoi trofeun kapitenes Bego, për ti lënë vend festës së vajzave korçare.
