Ish-kryeministri Sali Berisha ka denoncuar këtë të martë se në gjimnazin e Krujës është hedhur lëndë helmuese, ndërsa ngjarja është mbajtur e fshehtë nga autoritetet.
“Hidhet lëndë helmuese në gjimnazin e Krujës. Nxënsit braktisin klasat. Ngjarja mbahet e fshehtë”, shkruan Berisha në një postim në “FB”, teksa shton se ka marrë një mesazh nga një qytetar për ngjarjen.
Në mesazhin denoncuar shkruhet: Ne gjimnazin e krujes eshte hedhur nje lende helmuese, te gjith nxensit jan ne oborrin e shkolles, te shkruajta se duan ta mbajne te fshehur.
Policia dha informacion për rastin pas denoncimit nga Berisha.
Sipas bluve, ka qenë një nxënës që ka hedhur spraj piperi gjatë në një prej klasave të shkollës. Për pasojë, disa nxënës kanë përfunduar në spital për shkak të shqetësimeve të krijuara.
“Më datë 12.09.2023, në një gjimnaz në Krujë, një nxënës 16 vjeç ka hedhur në klasë, gjatë procesit mësimor, një sprajt me përmbajtje piperi, i cili si pasojë ka krijuar shqetësime te disa nxënës të klasës. Nxënësit po marrin ndihmën mjekësore në spitalin rajonal Krujë, ndërsa autori i dyshuar, së bashku me një 17-vjeçar, janë shoqëruar në komisariat, për veprime të mëtejshme. Grupi hetimor po punon për sqarimin e rrethanave të ngjarjes”, njoftoi policia.
