41-vjeçari Leartiad (Laert) Keka (Lekaj) u godit nga pas me makinë nga autorët, më pas u ekzekutua. Policia e Vlorës ka rindërtuar mekanizmin e vrasjes që tronditi qytetin bregdetar mbrëmjen e së shtunës, me viktimën i cili lëvizte me motor në momentin që u ekzekutua.
Burime bëjnë me dije se 41-vjeçari ka dyshime të ketë pikasur autorët teksa e ndiqnin me makinën tip Audi dhe në tentativë për t’u larguar ato e kanë përplasur.
Megjithatë dhe pas kësaj viktima është përpjekur të largohet me vrap, duke përshkruar vetëm disa metra pasi vrasësit e qëlluan atë nga afër me gjashtë plumba pistolete.
Kamerat e sigurisë në zonë konsiderohen me tepër rëndësi për hetuesit të cilët shpresojnë se përmes tyre të bien në gjurmët e autorëve të cilët dyshohet se ishin tre persona.
Për identifikimin e tyre në polici janë shoqëruar dhjetëra persona, por deri tani grupi hetimor nuk ka ende asnjë të dyshuar.
Sipas Tv Klan, dy janë pistat e hetimit që po verifikohen nga prokuroria dhe policia. Konkretisht ajo e hakmarrjes, si dhe ndonjë konflikti të mundshëm të kohëve të fundit ku viktima mund të ketë qenë i përfshirë.
41-vjeçari Leartiad Keka nuk është një emër i panjohur për policinë. Vite më parë ai ka qenë i dënuar për grabitje me pasojë vdekjen në Vlorë, ndërsa gjithashtu rezulton lidhje e ngushtë shoqërore me disa personazheve me rekorde kriminale në këtë qytet.
