Siç shihet dhe nga fotot e mëposhtme, vendi ku u krye atentati i djeshëm në Vlorë ka qenë i rrethuar me kamera sigurie të bizneseve në rrugë, por duket se kjo nuk i ka ndaluar autorët që të zbrasnin kallashnikovin ndaj 41-vjeçarit Leartiad Keka.
Pamjet e këtyre kamerave të sigurisë, janë e vetmja ndihmë për momentin e Policisë që mund të çojë në zbardhjen e kësaj vrasje dhe identifikimin e autorëve.
Deri më tani, e vemtja pistë për këtë vrasje është ajo e hakmarrjes, Leartiad Keka rezulton i akuzuar nga drejtësia për një vrasje në bashkëpunim të ndodhur 23 vite më parë.
Referuar një vendimi të Gjykatës së Lartë të vitit 2005, krimi është shënuar më 18 Gusht të vitit 2000 te “Kthesa e Gushajve” pranë Llakatundit. Në atë ngjarje, që sipas hetimeve të kohës ka qenë një tentativë grabitje, ka mbetur i vrarë Vendim Malaj, ndërsa si autorë janë arrestuar dhe dënuar Leartiad Keka dhe Fjodor Mezyraj, të cilët pas një sage të gjatë gjyqësore kanë fituar pafajësinë. Për këtë krim, Leartiad Keka ka kryer rreth 10 vite burg.
Pas atentatit të djeshëm, policia ka shoqëruar disa persona për t’i marrë në pyetje, si familjarë të viktimës, por edhe protagonistë të krimit të regjistruar 23 vite më parë.
Në auomjtetin “Audi A6” ngjyrë të zezë me targa italiane të autorëve, dyshohet se kanë qenë 2-3 persona, teksa personi i cili ka qëlluar me kallashnikov ka qenë i ulur në sediljen e pasagjerit.
Teksa ka qenë duke udhëtuar me motor, fillimisht 41-vjeçari është goditur nga makina e autorëve. Pasi ka rënë nga motori, Kekaj ka ecur për rreth 100 metra, ndërsa autori e ka ndjekur nga pas edhe është siguruar që ta vrasë. Më pas 41-vjeçari është qëlluar sërish para kishës Ortodokse. Në fund, autori ka zbritur nga makina dhe e ka qëlluar sërish, për t’u siguruar se e ka vrarë.
Në vendin e ngjarje janë gjetur 28 gëzhoja plumbash kallashnikovi, teksa Leartiad Keka ka patur plagë të shumta plumbi në trup dhe në kokë. Dyshohet se autorët kanë qenë vrasës me pagesë.
Pas atentatit, autorëve u është dashur 12 minuta me automjetin e tyre për t’u larguar nga qyteti i Vlorës e më pas për ta djegur atë në aksin Kote-Sevaster. Brenda automjetit të djegur është gjetur edhe kallashnikovi që dyshohet se është përdorur nga autori për të ekzekutuar 41-vjeçarin.
