Prokuroria e Posaçme i ka kërkuar këtë të enjte Ministrisë së Drejtësisë që të nis procedurat për ekstradimin nga Franca të Behar Bajrit, i shpallur në kërkim në kuadër të operacionit “Metamorfoza”. Ky i fundit u arrestuar të hënën e 4 shtatorit në një lokal në Paris.
Në kërkesën e SPAK është paraqitur praktika në lidhje me këtë të akuzuar bashkëngjitur edhe vendimin e Gjykatës së Posaçme Kundër Korrupsionit dhe Krimit të Organizuar me akuzat dhe provat ndaj tij, për të cilin GJKKO ka caktuar masën e arrestit në burg në mungesë.
Ministria, e cila ka për kompetencë të lidh kontaktet përmes letërporosisë me autoritetet franceze ka 40 ditë kohë për të përkthyer dhe kopsitur materialin që më pas të niset drejt Parisit, afat që nis me ditën e arrestimit.
Behar Bajri, i cili ka kërkuar azil në Francë që prej vitit 2021 pritet të përdorë çdo praktikë ligjore që përfshinë të drejtat e njeriut për të kundërshtuar ekstradimin e tij drejt Tiranës dhe përballje me drejtësinë për dosjen “Metamorfoza”. Megjithatë, do të jenë gjykatat atje që do të japin fjalën e fundit, proces që mund të zgjas deri në disa muaj deri në vendimin e fundit të të gjitha shkallëve.
Me këtë rast, autoritetet shqiptare janë optimiste për ekstradim pasi vetë Franca disa muaj më parë, bashkë me Belgjikën, i vunë në dispozicion SPAK biseda të Bajrit dhe 15 personave të tjerë në hetim, biseda të dekoduara në aplikacionin SkyECC.
Hetimet nisën në 2019-ën pasi autoritetet belge dhe holandeze siguruan komunikime në rrjetin “Enchro Chat” dhe “SKY”. Nga hetimet rezultoi se biznesmeni Pëllumb Gjoka, tashmë i arrestuar, ka kërkuar nga Behar Bajri që të kryente vrasjen e Kleanthi Musabelli një ish-punonjës i policisë së burgjeve.
Në dosje u zbulua gjithashtu se si Bajri kishte bashkëpunuar edhe me Ervis Martinajn.
