Pas zjarreve të frikshme që shkaktuan dëme kolosale, Greqia është përfshirë nga një mot i keq me rebeshe të mëdha shiu dhe stuhi të forta, e cila është emëruar si “Daniel”.
Shumë qytete dhe fshatra janë përmbytur, ndërsa njerëzit gjenden të vështirësi të mëdha. Situata dramatike raportohet në fushën e Kardicës. Pothuajse të gjitha fshatrat janë nën ujë. Njerëzit janë ngjitur mbi çati, ose në vende më të larta për të kërkuar ndihmë. Është kërkuar ndërhyrja e Forcave të Armatosura, ndërsa po ashtu kërkohet dhe helikopter për shpëtimin e qytetarëve.
Një qytet i mbytur në baltë është dhe imazhi i Volos, i kapur nga kamera e dronit. Mbi 200,000 njerëz në Volos dhe në periferi në Agria dhe Lechonia janë përballur me pasoja të rënda.
Pa energji elektrike për shumë orë, pa ujë të pijshëm, pa transport, telekomunikacion dhe internet, situata në Volos është e pashpresë për banorët. Banorët e Magnezisë po shohin qiellin, pasi qyteti nuk mund të përballojë një tjetër fatkeqësi natyrore.
Sipas buletinit të përditësuar të EMY , moti i keq “Daniel” do të vazhdojë deri të enjten pasdite. Konkretisht, reshje të dendura shiu dhe stuhi parashikohen në Thesali, Sporada, Sterea qendrore dhe lindore (kryesisht prefekturat Evrytania, Fthiotida) dhe Evia veriore.
