Janë zbardhur emrat dhe detajet e reja nga plagosja me thikë e regjistruar mbrëmjen e kësaj të enjte në Shkodër.
Burime bëjnë me dije se 68-vjeçari Zef Paloka, nga fshati Laç i Vaut të Dejës, ka tentuar të kryente marrëdhënie seksuale me dhunë me 21-vjeçaren N.N. Kjo e fundit, në kushtet e vetëmbrojtjes e ka qëlluar disa herë me thikë të moshuarin, duke i shkaktuar plagë në trup.
Ngjarja e rëndë ka ndodhur në shtëpinë e 21-vjeçares në fshatin Dejë të Vaut të Dejës. Mësohet se N.N. ka qenë e vetme në banesë në momentin kur Zef Paloka ka tentuar të kryejë marrëdhënie seksuale me dhunë me të.
Zef Paloka ka shkuar i plagosur rreth orës 21:30, në urgjencën e spitalit të Shkodrës, ku po merr ndihmë mjekësore dhe ndodhet jashtë rrezikut për jetën. Policia ka shoqëruar në komisariatin e Vaut të Dejës 21-vjeçaren N.N, për veprime të mëtejshme.
Burime bëjnë me dije se pas shoqërimit në komisariat, në dëshminë e dhënë për grupin hetimor, vajza ka pranuar autorësinë e plagosjes dhe ka deklaruar se i moshuari ka tentuar të kryejë marrëdhënie seksuale me dhunë me të.
Grupi hetimor nën drejtimin e Prokurorit po punon për sqarimin e rrethanave të sakta të ngjarjes dhe dokumentimin ligjor të këtij rasti.
