Nuk ka pasur asnjë rrjedhje të të dhënave nga sistemi TIMS. Ka qenë kjo deklarata e ministrit të Brendshëm Taulant Balla, në një dalje për mediat për komunikimin e vendimeve të marra nga qeveria në mbledhjen e sotme.
Sipas ministrit, në fakt bëhet fjalë për “kritika apo ankesa” të atyre punonjësve të policisë së shtetit që janë larguar nga ekipi i ri i ngritur për “pastrimin e strukturës.”
“Ata që janë larguar mund të kenë kritika, ankesa, mund të ngrenë dyshime për punën që po bëjnë ata që kanë marrë këtë detyrë. Asnjë e dhënë nga TIMS nuk ka rrjedhur.”
Ndërsa, sa i përket kallëzimit të bërë nga AMP në prokurori, Balla thotë se është bërë me kërkesë të tij, për të treguar transparencë.
“Nuk ka kallëzim, unë kam kërkuar që të dhënat e disponuara nga AMP, të vlerësohen edhe nga ana e prokurorisë. Një standard i ri që do të vendoset në të gjitha strukturat e varësisë që unë kam nderin të drejtoj.”
Teksa u përgjigjej pyetjeve të gazetarëve, Balla theksoi se procesi i vetëpastrimit në Policinë e Shtetit sapo ka filluar dhe do të vijojë.
“Punonjës policie që tradhtojnë aksionet e policisë, do të jenë në zhdukje të vazhdueshme. Fijet që lidhin punonjës të caktuar të policisë së shtetit, me organizata kriminale, apo me tradhtimin e operacioneve të policisë, do të vijojnë të priten.”
