Prokuroria e Posaçme ka vendosur të marrë sërish në pyetje ish-ministrin e Shëndetësisë, Ilir Beqja, lidhur me koncesionin me vlerë 100 milionë euro të sterilizimit.
Vendimi i SPAK vjen një ditë pasi Ilir Beqja mohoi “miqtë”, njëjtë si në çdo skandal tjetër të qeverisë Rama, kur faktet për marrëdhëniet e ngushta personale me përfituesit e koncesioneve dalin në dritë.
“I njoh të dy. I kam njohur pasi jam bërë ministër dhe në zbatim të detyrës sime si ministër. Nuk kam zhvilluar ndonjë miqësi të veçantë… Mund të qëllojë që në ato fluturime të jenë miq, shokë, kontraktorë, bashkëpunëtorë etj. Vetëm pse jenë atë fluturim kjo nuk besoj se është indicia për fajësi”, shkruantë ish-ministri i Ramës ditën e djeshme.
Por nuk duket i bindur organi i akuzës, që deri më tani ka çuar pas hekurave dia zyrtarë, përfshirë ish-zv/ministrin Klodian Rjepaj dhe biznesmenin përfitues të PPP-së, Ilir Rrapaja.
SPAK sipas zhvillimeve të reja në pallatin e drejtësisë, do të ripyesë Beqjan pikërisht për raportin miqësor me biznesmenët Ilir Rrapaj dhe Umbro Staçini, por edhe udhëtimin në Vjenë.
Ende nuk është vendosur se kur do të thirret për t’u ripyetur ish-ministri, pasi GJKKO orientoi SPAK të hetonte rreth rolit të tij.
