Banorët e fshatit Berishë në Fushë-Arrëz kanë dalë në protestë ditën e sotme, për të disatën fundjavë rresht, ku kërkojnë lirimin e ish-kryebashkiakut Fran Tuci, të arrestuar nga SPAK, i cili akuzohet se në kundërshtim me kuadrin ligjor, ka lejuar hapjen e një segment të ri rrugor rreth 1.8 km dhe gjerësi rreth 5 m, i cili ka cenuar një sipërfaqe të konsiderueshme të fondit pyjor në pronësi të kësaj Bashkie si edhe ka dëmtuar terrenin që i përket këtij fondi pyjor.
Banorët shprehen se rruga ishte ekzistuese që në kohen e diktatures, të cilën e kishte hapur gjeologjia dhe se gjithë traseja nuk kalon në pyje të larte sic pretendohet edhe për përllogaritjen e dëmit.
Banoret e fshatit të thellë të veriut akuzojnë një kompani private për shfrytëzimin e kromit se ka bllokuar rrugën, që lidh ato me qëndrën e njësisë administrative. Ata i bëjnë apel shtetit të inspektojë aktivitetin e kësaj kompanie, e cila edhe pse ka shkaktuar dëme, sipas tyre askush nuk merret me të.
Banorët apelojnë për lirimin e ish-kryebashkiakut teksa shprehen se ndihen në faj për lutjen që i bën për lëshimin e lejes për pastrimin e rrugës.
Ish-kryebashkiaku Fran Tuci u arrestua mbrëmjen e të martës së 12 korrikut bashkë me dy bashkëpunëtorët e tij, Ndoc Markun dhe Durim Markgjekajn.
Ai akuzohet nga SPAK për dy vepra penale: “Shpërdorimi të Detyrës” dhe “Shkatërrimi të pronës” pasi përmes veprimeve apo mosveprimeve të tij lejoi ndërtimin e një rruge në një zonë të pyllëzuar. Dëmi i shkaktuar nga ndërtimi i kësaj rruge përllogaritet nga SPAK në vlerën 234 milionë lekë. Veç dëmit ekonomik, përllogaritet dhe dëmi mjedisor, për shkak të gërmimeve krahas në volume të konsiderueshme në zonën e pyllëzuar.
