“Nuk ka prova është një gjë e pavlerë, e montuar vetëm e vetëm që Beleri të humbiste.”
Kështu u shpreh sekretari i organizatës OMONIA, Marin Suli, në një intervistë për Neës24, ku përveçse foli për protestën në Himarë, zbuloi edhe hapat e radhës që do të ndiqen për të mbështetur Fredi Belerin.
“Beleri nuk humbi sepse u votua. Ai duhet të bëjë betimin dhe të ushtrojë detyrën e tij si kryetar bashkie”, tha ai ndër të tjera.
Suli i cilësoi sit ë pavenda deklaratat e kryeministrit Edi Rama pas protestës në Himarë dhe paralajmëroi se do të ketë sërish protesta në mbështetje të Belerit.
“Dosja është qesharake dhe prokuroria ka përdorur dokumente të falsifikuara. Kjo është bërë e gjitha për ta lënë në burg. Deklarimet e zotit Rama janë deklarata për një Bashki që ai e ka humbur, pavarësisht se u investua për ta fituar. Presim zbardhjen e vendimit të Gjykatës së Lartë që ta apelojmë dhe më pas do t’i drejtohemi Strasburg. Nuk besoj se do të ketë përsëritje të zgjedhjeve sepse do të ketë një përçarje të madhe politike. Do të ketë një protestë tjetër, patjetër, besoj në shtator ose në tetor”, u shpreh Suli.
Sa i përket pjesëmarrjes së kryebashkiakëve të Greqisë, ai theksoi se prania e tyre ishte një mbështetje e hapur për Belerin.
“Nuk e shoh si diçka të keqe, se përse një qytetar i lirë europian ishte i pranishëm në një vend që aspiron të jetë europian”, deklaroi ai.
