Një qendërmbrojtës argjentinas është gati të vijë te Partizani.
Lajmi është konfirmuar dje nga mediat në shtetin amerikano-latin, të cilat kanë raportuar se 26-vjeçari Mauro Gabriel Osores është shënjestruar nga kampionët e Shqipërisë dhe tashmë pret të prishë kontratën me klubin Atletiko Tucuman për t’i hapur rrugën transferimit.
Sipas asaj që raporton portali afër klubit që ka në pronësi lojtarin, “eldiario24”, Partizani ka shfaqur interesim konkret për Osores dhe ky i fundit ka dhënë OK-in për kalimin në Shqipëri, por që më parë duhet të zgjidhë çështjen e kontratës.
Aktualisht qendërmbrojtësi është në formë huazimi te klubi i ligës së dytë argjentinase, Atletiko Rafaela, teksa kampionati është në kulmin e tij (janë luajtur 25 javë nga 34 në total).
Osores është aktivizuar si titullar në 20 ndeshje me 1800 minuta në fushë, ndërsa ka arritur të shënojë edhe dy gola me Atletiko Rafaelën.
Në ndeshjet e fundit ai është ulur në stol, pasi ka kërkuar të largohet nga skuadra. Mirëpo, për ta bërë këtë tashmë duhet të gjejë mirëkuptimin e dy klubeve, fillimisht të Atletiko Tucuman që ka në pronësi kartonin e tij, e më pas të Atletiko Rafaelës ku po luan aktualisht dhe me të cilën ka një marrëveshje si i huazuar deri në muajin dhjetor.
Përveç klubit të vendlindjes, Atletiko Tucuman, argjentinasi ka luajtur edhe për skuadra të tjera brenda shtetit amerikano-latin si Guilermo Broun dhe Central Norte. Vlera e tij në treg sipas faqes së specializuar “transfermarkt”, është 375 mijë euro.
