Në protestën e zhvilluar në Himarë, në mbështetje të kryebashkiakut të zgjedhur Fredi Beleri, nga podiumi u është drejtuar pjesëmarrësve në tubim edhe kreu i PBDNJ, Vangjel Dule.
Mesazhi i Dules ishte i drejtpërdrejtë për kryeministrin Edi Rama, për të cilin tha se sa më gjatë e mban Fredi Belerin në burg, aq më shumë i zvogëlohet koha e tij e qëndrimit në pushtet.
Dule më tej deklaroi se është i indinjuar për mënyrën sesi po trajtohet çështja Beleri nga drejtësia, pasi sipas tij po shkelen të drejtat themelore të njeriut.
“Të dashur himariotë, më lejoni të falënderoj kolegët e mi të parlamentit grek që ndodhen këtu mes nesh. Të gjithë do donim që situata të ishte ndryshe. Festa do ishte shumë e madhe, por kemi një protestë të madhe në vend të kësaj. Kemi indinjatë të thellë, sepse po shkelen të drejtat themelore. I drejtohem sërish kryeministrit të vendit, dëshiroj që sërish t’i kujtoj se çdo moment që zgjatet burgosja e tij, po kaq zvogëlohet qëndrimi i tij në pushtet. Edi Rama nuk e di më kë është ngatërruar”, u shpreh ai.
Ai shtoi se burgosja e Belerit është nje veprim regjimi, duke e krahasuar atë me burgosjen e Alexei Navalnyt në Rusi nga Vladimir Putin.
“Është metoda e sistemeve totalitare të mos funksionojnë ndryshe, të burgosin. Ashtu si në sistemet e tjera totalitare ka të burgosur, Edi Rama mban Fredin tonë. Ai donte dinjitetin e qytetarëve të tij dhe e burgosën. Ky është motivi i regjimeve që nuk funksionojnë dot pa të burgosur politikë. Putini mban të burgosur Navalnyn, ndërsa Rama mban Fredin tone”, deklaroi Dule.
