Sekretari i Përgjithshëm i Partisë së Lirisë, Tedi Blushi ka denoncuar ditën e sotme se dy prej katër të arrestuarve ditën e sotme në Pogradec, ku u kapën me 26 kilogramë kanabis duke e transportuar me varka drejt Maqedonisë së Veriut, janë vartës të ministres së Bujqësisë.
Në një postim në rrjetet sociale, Blushi shkruan se arrestimi i tyre erdhi falë ndihmës së shërbimeve partnere. Sipas tij, këto skandale të njëpasnjëshme provojnë se kartelet e drogës janë përhapur në çdo qelizë të shtetit dhe se ky trafik i mirëfilltë qeveritar, nuk mund të zhvillohet pa dijeninë dhe bekimin e Edi Ramës dhe ministrave të tij.
Kujtojmë se sot në Pogradec u arrestuan shtetasit Ardian Toska, 51 vjeç, Aurel Toska (punonjës pranë Qendrës së rritjes së Rasatit të Koranit), 43 vjeç, Roni Sulollari, 45 vjeç, Tane Bllazhe (punonjës pranë Qendrës së rritjes së Rasatit të Koranit), 53 vjeç.
Dy vëllezërit, Ardian dhe Aurel Toska siguronin lëndën narkotike që do të trafikohej dhe e magazinonin atë në afërsi të Qendrës së Rasatit të Koranit, në Pogradec. Më pas lënda narkotike trafikohej drejt Maqedonisë së Veriut, me varka peshkimi që drejtoheshin nga shtetasit Roni Sulollari dhe Tane Bllazhe.
Postimi i Tedi Blushit:
PAS USHTARËVE TË PELESHIT EDHE VARTËSIT E FRIDA KRIFCËS KAPEN ME DROGË!
Sot në Pogradec janë ndaluar në flagrancë dy punonjës lokalë të Ministrisë së Bujqësisë për trafik ndërkombëtar narkotikësh.
Arrestimi i tyre (falë ndihmës së shërbimeve partnere) vjen vetëm pak ditë pas zbulimit të serave të kanabisit në repartin special të Forcave të Armatosura të mbjella nga vetë ushtarët!
Këto skandale të njëpasnjëshme provojnë se kartelet e drogës janë përhapur në çdo qelizë të shtetit dhe se ky trafik i mirëfilltë qeveritar, nuk mund të zhvillohet pa dijeninë dhe bekimin e Edi Ramës dhe ministrave të tij.
Narko-Qeveria nuk është një fantazi!
Inkriminimi i administratës publike, në funksion të blerjes së zgjedhjeve me paratë e drogës, është fakt që vërtetohet çdo ditë!
Kjo është fytyra e së keqes që duhet shkulur me rrënjë!
Në foto: Sasia e drogës që ju kap sot dy vartësve të ministres së Bujqësisë, Frida Krifca që do trafikohej drejt Maqedonisë së Veriut.
