Për herë të parë Italia do t’u njohë të drejtën shqiptarëve për të përfituar pension edhe për vitet e punës në Shqipëri. Ky lajm po qarkullon prej tre vitesh, por marrëveshja mes dy shteteve nuk është arritur ende.
Ngadalësimi i procedurave për njohjen e pensioneve ka detyruar pensionistët shqiptarë në Itali të protestojnë ditën e sotme para ambasadës italiane në Tiranë.
Por, për njohjen e viteve të punës në Shqipëri nga Italia, nuk kanë munguar prej vitesh mburrjet nga kryeministri Edi Rama, prej vitesh, duke i mashtruar shqiptarët e Italisë, pasi ende edhe sot nuk kemi një marrëveshje të kokretizuar.
Më 27 Dhjetor, kryeministri Edi Rama ka bërë “zëdhënësin” e parlamentit italian ku deklaronte se ky institucion kishte përfshirë në projekt-buxhetin për vitin 2022 një amendament për nisjen e procesit të njohjes së pensioneve të shqiptarëve në Itali.
“Lajm i mirë për shqiptarët në Itali! Në vazhdën e komunikimit me qeverinë italiane dhe partitë politike për marrëveshjen e pensioneve, Parlamenti Italian ka përfshirë në projekt-buxhetin e Italisë për vitin 2022 edhe një amendament për nisjen e procesit të njohjes faktike të pensioneve të shqiptarëve me kontribute pune në vendin mik. Vazhdojmë kontaktet deri në aprovimin përfundimtar të projekt-buxhetit 2022 dhe me këtë rast u shpreh mirënjohjen në emër të shqiptarëve në Itali, kryeministrit Mario Draghi, ministrit të jashtëm Luigi di Maio, të cilët janë angazhuar personalisht për ta zgjidhur këtë çështje kaq jetike për aq shumë shqiptarë të mirë në Italinë mike, si edhe të gjithë të tjerëve që dashamirësisht janë përfshirë në këtë përpjekje të përbashkët”, shkruan Rama në rrjetet sociale.
Një vit më pas, më 26 Korrik të vitit 2022, kryeministri Edi Rama njoftonte se Shqipëria dhe Italia sapo kishin përfunduar negocimin teknik të marrëveshjes për pensionet. Në postimin e tij, Rama nuk nguronte të falenderonte dhe Italinë.
“LAJM I MIRË Shqipëria dhe Italia sapo kanë përfunduar negocimin teknik të marrëveshjes për pensionet. Pas përfundimit të procesit teknik do të ndiqen procedurat për firmosvulosjen e kësaj marrëveshje dhe më në fund, pas një përpjekje të gjatë e thuajse të pamundur, rreth 500 mijë shqiptarë pritet të përfitojnë me hyrjen e saj në fuqi #GrazieITALIA” – shkruante Rama në rrjetet sociale.
Tani, jemi në Gusht të vitit 2023 dhe sërish, marrëveshja mes Italisë dhe Shqipërisë për njohjen e të drejtës së shqiptarëve për të përfituar pension edhe për vitet e punës në Shqipëri, nuk është arritur ende.
Nga marrëveshja, nëse realizohet, pritet që të përfitojnë rreth 500 mijë shqiptarë, që kanë jetuar dhe punuar në kohë të ndryshme në të dyja vendet.
