100 milionë euro nuk mjaftojnë? Atëherë ja ku keni 110 milionë. Bayerni i Mynihut rrit me 10 milionë ofertën për të shkëputur nga Tottenham qëndërsulmuesin Harry Kane, i cili ka ende edhe 1 vit kontratë me “Gjelat” londinezë.
Gjermanët kërkojnë ta zgjidhin këtë çështje brenda së dielës kur Tottenham do të zbresë në fushë për të luajtur ndeshjen e parë të sezonit kundër Brentford dhe tashmë topi është sërish në këmbët e Tottenham që duhet të vlerësojë ofertën e bavarezëve të cilët janë prej kohësh në ndjekje të sulmuesit anglez.
Në rast se nuk do të arrihet marrëveshja deri të dielën, Kane ka bërë me dije se do të qëndrojë në Londër për të luajtur edhe në sezonin e fundit të kontratës e më pas mund të largohet me parametra zero në muajin qershor të vitit të ardhshëm.
