Nga Boldnews.al
Mesditë, 7 gusht në Vlorë. Doganieri i pushtetit të Rilindur, biri i dy prindërve me punë të rëndësishme, babai drejtues në Kadastër dhe nëna në majë të sistemit të drejtësisë së re, grushton për vdekje 55-vjeçarin. 24 orë më pas… Një varr i hapur në Vlorë, qindra njerëz familjarë e të afërm derdhin lot me brengën se grushtet e pushtetit i morën jetën Armando Meshaut, inxhinier në profesion dhe prej disa vitesh ndërtues. Nurihani rri e pret, Azizi po ashtu, i biri vrasës shfajësohet se “vetëm dy grushta i futa, nuk doja ta vrisja”.
Çudia më e madhe tre ditë zgjat, aq sa rrinë hapur dyert e mortit për një të vrarë nga sekseri doganier që mbështetej nga prindërit e pushtetshëm. Drejtësi kërkohet. Po në dorën e kujt është drejtësia? Nëna e Rei Metës, autorit të krimit, është Nurihan Seiti (Meta), anëtare e Këshillit të Lartë të Prokurorisë. Është personi që me votën e saj emëron prokurorë, zgjedh kreun e SPAK, apo i jep mundësi që të katër anëtarëve juridiksa të “Familjes Felaj” të punojnë në një prokurori.
Nurihani e kapi atë “vend pëllumbash” në mënyrë mjaft të dyshimtë, pasi para viteve 90’ ka qenë pjesë e sistemit të drejtësisë, madje kur sistemi komunist ishte në degradim dhe në prag të humnerës, ajo dënon një të ri nga Fieri për “agjitacion dhe propagandë kundër pushtetit Popullor”, pasi sipas saj: “ai mendonte keq për udhëheqësin e kohës Ramiz Alia”. Me këtë CV kaq të pasur mban ende detyrën e lartë. E mban edhe pasi i biri, doganier zyrtarisht dhe sekser praktikisht, vrau një inxhinier pasi kërkonte t’i falte një apartament për sekserllëqet e tij.
Po drejtësia “punë sekserësh” është? Ajo ende nuk ka dhënë dorëheqjen. Kanë kaluar 24 orë nga ngjarja e rëndë dhe Nurihan Seiti as një reagim të thatë ndjese si nënë nuk ka dhënë, e jo më një dorëheqje që në këtë rast do ishte më minimalja jo vetëm moralisht, por edhe ligjërisht.
Përse moralisht? I biri i saj sot akuzohet për vrasje, me grushtat e fortë të tij si një “Taison” një nën mjekër dhe katër të tjera rrëzë veshit dhe pas kokës. Një jetë njeriu mori ky doganieri sekser që në emrin e prindërve futej si ndërjetës pronash, mu bash në atë Vlorën e trazuar ku vetëm me shumë para ose me ndërhyrje nga “lart” mund të fitosh një pronë që të takon. Është e pranuar tashmë që duke përdorur emrin e prindërve ai ndërmjetësonte, premtonte “zgjidhje problemesh”, madje edhe të karakterit ligjor. Moralisht, Nurihani jo sot, por dje, pasi nesër është edhe më vonë, duhet të kishte shkruar një rresh të vetëm: “Jap dorëheqjen e parevokueshme”. Nuk e ka bërë dhe me gjasë as nuk do e bëjë. A mos vallë është me parimin kryeministror se: “Përgjegjësia është individuale” dhe se i biri “ka ngrënë dardha pas kurrizit të saj”? Padyshim që nuk e kanë të lehtë prindërit e “grusht-hekurit” këtë situatë. Askush nuk gjykon se janë të qetë, por një fije moral në raste të tilla kërkohet. Ende morali nuk po duket.
Përse ligjërisht? Çështja e Rei Metës “boksierit vrasës” do të kalojë në Prokurorinë e Vlorës për hetim. Po cili prokuror mund të zbatojë ligjin me përpikmëri kur e ka Nurihan Seitaj (Meta) si ‘eprore indirekte’ që merret me transferimet, procedimet e mundshme apo edhe rritjet në detyrë të prokurorëve? Kjo është pjesa ligjore që duhet parë me imtësi, pasi morali vështirë të gjendet aty ku ligji i vërtetë është dhuna.
