Ish-ministrja e Financave, Anila Denaj është paraqitur mëngjesin e kësaj të premteje në SPAK, ku u pyet lidhur me koncesionin e sterilizimit të instrumeve kirurugjikale.
Në një prononcim të shkurtër për gazetarët pas daljes nga SPAK, Denaj tha se është pyetur si një person që ka dijeni në lidhje me këtë koncesion gjatë kohës që ka qenë drejtoreshë e Shërbimeve Mbështetëse në Ministrinë e Financave. Edhe pse i janë drejtuar pyetje të tjera për të mësuar më shumë rreth dëshmisë së Denajt në SPAK, kjo e fundit nuk ka preferuar që të jepë më shumë detaje.
“Jam pyetur për informacion që kam dijeni gjatë kohë që kam qenë drejtoreshë e Shërbimeve Mbështetëse në Ministrinë e Financave në vitin 2014 në kohën që ky koncesion ka qenë në diskutim. Ky nuk është momenti për të dhënë më shumë detaje”, tha shkurtimisht deputetja e PS.
Vitin e kaluar, për koncesionin e sterilizimit u pyet në SPAK edhe ish-ministri i Shëndetësisë, Ilir Beqaj. Ish-zv.ministri i Shëndetësisë, Klodian Rrjepaj dhe zyrtarë të tjerë janë marrë po ashtu në pyetje.
Sterilizimi është një nga dosjet e para që u regjistrua në SPAK pas kallëzimit të Nismës Thurje në dhjetor të vitit 2019.
Kontrata koncesionare është lidhur në 2015 mes kompanisë “SaniService” dhe Ministrisë së Shëndetësisë të drejtuar nga Beqaj, i cili dyshohet se ka favorizuar fituesin.
Koncesioni i sterilizimit është kthyer në një “gropë të zezë”, duke thithur më shumë shuma monetare sesa ishte planifikuar.
Mjekë të njohur kanë ngritur shqetësime lidhur me shifrat e fryra të koncesionit, ndërsa opozita e ka cilësuar një aferë korruptive.
